О.Алтангэрэл: Хууль бус хөрөнгийг нөхөн төлүүлэх, хураах ажлыг төрийн өндөр албан тушаалтнуудаас эхэлнэ
Нийтийн албан тушаалтны хууль бус хөрөнгийг хураахтай холбоотой хуулийн төслийг шинэчлэн Улсын Их Хурал(УИХ)-д өргөн барихаар болжээ.
Засгийн газраас нэгдүгээр сарын 24-нд уг хуулийн төслийг өргөн барьсан хэлэлцэлгүй удсан тул буцаан татсан байна. Үүн дээрээ зохих өөрчлөлтүүдийг хийж, дахин УИХ-д өргөн барихаар тогтсоноо Хууль зүй, дотоод хэргийн сайд О.Алтангэрэл хэлэв.
Тэрбээр энэ талаар "Монгол Улсын Засгийн газрын нэгдүгээр сарын 22-ны өдрийн хуралдаанаар нийтийн албан тушаалтны хууль бус хөрөнгийг хураах, нөхөн төлүүлэх тухай хуулийн төслийг өргөн мэдүүлэхийг дэмжсэн. Нэгдүгээр сарын 24-нд УИХ-д хүргүүлсэн. Энэ бол зөвхөн хөрөнгө хураах тухай биш, авлигын эсрэг багц хуулийн төсөл юм. Гэтэл тов өгөөгүй, хэлэлцүүлж чадалгүй олон сар үзсэн. Иймд өнгөрсөн Даваа гарагт УИХ-аас татаж аваад, зохих өөрчлөлтийг хийж, өнөөдрийн хуралдаанаар хэлэлцэн УИХ-д өргөн мэдүүлэхээр тогтож байна.
Энэ бол нийтийн албан тушаалтны хууль бус хөрөнгийг иргэний журмаар нөхөн төлүүлэх, хурааж авах тухай гэж өөрчлөөд субъектүүдийг нь төрийн өндөр албан тушаалтнуудаас эхлэх байдлаар өөрчилсөн.
Процессын хувьд 2002 оноос хойш хуулийнхаа үйлчлэлийг хэрэгжүүлэхээр тусгаж байгаа. 2002 оноос хойш эрүүгийн хэрэгт яллагдагчаар татагдан шалгагдаж байгаад өршөөгдсөн хүмүүс, шүүхээр орж, авлигын хэрэгт ял авсан хэр нь хөрөнгөө хураалгаагүй хүмүүс, мөн ямарваа нэг байдлаар эрүүгийн хэрэгт буруутгагдаж, шүүхийн шийдвэр гараагүй боловч хөрөнгөө тайлбарлаж чадахгүй хүмүүс бий. Эдгээр хөрөнгийг иргэний шүүхийн журмаар хураая гэсэн өөрчлөлттэй. Ял шийтгэлгүй, хөрөнгийг хураана" гэв.
"Ухаа худагтай зэрэгцүүлээд л бусад үйл явдал өрнөдгийг улстөрчийн хувьд анхааралтай ажиглаж байна"
Сэтгүүлчид түүнээс хуулийн төслийг өргөн барихад тов өгөхгүй ингэж удсан учир шалтгаан нь юу байх магадлалтай талаар тодруулахад сайд О.Алтангэрэл "Бид үүн дээр гайхаж байгаа. Түрүүнд нь Ухаа худагтай холбоотой асуудал ярьсан. Ухаан худагтай холбоотой санал дүгнэлт гаргах ажлын хэсгийг 2025 оны хоёрдугаар сарын 17-ны өдөр Монгол Улсын Засгийн газрын хуралдаанаас шийдвэрлэж гаргасан. Санал дүгнэлтээ гаргаад УИХ-д хүргүүлсэн. Хэлэлцэхгүй байсан. Тавдугаар сарын 8-ны өдөр УИХ дээр ажлын хэсэг байгуулагдлаа.
Түүх харвал өнгөрсөн 18 жилийн хугацаанд Ухаа худаг, Тавантолгойг ярьсан улстөрч олон байх боловч Засгийн газрын түвшинд албан ёсоор санал дүгнэлт гаргасан нь анхны тохиолдол. УИХ-ын түвшинд ажлын хэсэг байгуулж байгаа нь саяны тохиолдол. Гэтэл энэ хугацаанд буюу гуравдугаар сарын 26-ны өдөр Ухаа худгийн орд газрыг эзэмшиж үйл ажиллагаа явуулж байгаа Энержи Ресурс компани 350 сая ам.долларын өрийн бичиг босгосон байна. Яагаад УИХ-аар хэлэлцүүлэхгүй удав аа гэдэг асуудал гарч байгаа.
Гуравдугаар сарын 26-нд 350 сая ам.долларын өрийн бичиг гаргасан. Товчхондоо "Та нар 34 хувиа авбал ав, гэхдээ 150 сая ам.доллартой тэнцэхүйц үүрэг та нар оногдоно шүү" гэдэг утга агуулга уншигдаж байна. Мөн УИХ дээр дөнгөж ажлын хэсэг байгуулагдсаны дараа хамтарсан Засгийн газар байх уу, үгүй юу гээд бас асуудлууд үүсэж байна. Ухаа худгийн үйл явдалтай зэрэгцүүлээд л бусад үйл явдал өрнөдгийг улстөрчийн хувьд анхааралтай ажиглаж байна" гэв
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
43 СЭТГЭГДЭЛТЭЙ
|
