Гэрэл зургийг MPA агентлагийн онцгой зөвшөөрөлтэйгөөр ашиглав

Засгийн газрын ээлжит хуралдаанаас гаргасан зарим шийдвэрийг Соёлын сайд Ч.Номин танилцууллаа. 

Үүнтэй холбоотойгоор Соёлын сайд Ч.Номин дараах мэдээллийг хүргэсэн юм. 

Тэрбээр хэлэхдээ "2023-2028 оныг Монголд зочлох жил болгон зарласан билээ. 

Энэ хүрээнд ажлаа эрчимжүүлэхээр төлөвлөн, аялал жуулчлалын салбарт үйл ажиллагаа явуулж байгаа ААН-үүдийн хөрөнгө оруулалтуудыг нэмэгдүүлэх зорилгоор Засгийн газраас тогтоол гарсан. 

Аялал жуулчлалын салбарт үйл ажиллагаа явуулж байгаа ААН-үүдэд бага хүүтэй, урт хугацаатай, хөнгөлөлттэй зээлийг бий болгох суурийг тавьсан гэсэн үг. Ингэхдээ зургаан жил хүртэлх хугацаанд зургаан хувийн хүүтэй зээл гаргах Засгийн газрын тогтоол гарлаа.

Салбартаа зөвлөх үйлчилгээ үзүүлдэг олон улсын "Бостон Консалтинг Групп"-тэй өнгөрсөн жил хамтран ажиллаж, аялал жуулчлалын нөхцөл байдал, аялал жуулчлалыг хөгжүүлэхэд чиглэсэн судалгааг гарган 2030 он хүртэлх стратегиа тодорхойлсон.

Бид 2030 он гэхэд нийт хоёр сая жуулчин хүлээж авахаар зорилт тавьж байгаа.

Ингэснээр Дотоодын Нийт Бүтээгдэхүүний 10 орчим хувийг аялал жуулчлалын салбараас бүрдүүлэх, цаашлаад эрчимтэй хөгжиж буй олон улсын зах зээлийг Монголд илүү төвлөрүүлэх боломжийг бий болгоно.

Хамгийн гол нь энэ салбарт хөрөнгө оруулалт шаардлагатай. Ойролцоогоор 11 их наяд төгрөгийн хөрөнгө оруулалт шаардлагатай гэж үзсэн.

Үүнийг хийж хэрэгжүүлэхэд нислэгийн тоог нэмэгдүүлэх, хот хоорондын дэд бүтцийг сайжруулах гэх мэтчилэн томоохон хөрөнгө оруулалтуудыг төрийн зүгээс хийж хэрэгжүүлэх шаардлагатай.

Дөрвөн улирлын аялал жуулчлалыг дэмжсэн хөрөнгө оруулалтуудыг хувийн хэвшлийнхэнд үзүүлэх нь зүйтэй гэж үзсэн учраас хөнгөлөлттэй зээл гаргахаар төлөвлөж байна" гэлээ. 

"Зээлийг тогтвортой 5-6 жил хэрэгжүүлж чадвал 600,000 орчим жуулчныг нэмж оруулж ирэх боломжтой"

Үргэлжлүүлэн "Олон улсын зөвлөх үйлчилгээний сууринд тулгуурлан зочлох үйлчилгээний салбарт буюу

• байрших үйлчилгээ
• жуулчдыг ая тухтай байхад хэрэгцээтэй боловсон ариун цэврийн байгууламжтай төвүүдийг бий болгох
• жуулчны баазуудыг дөрвөн улиралд үйл ажиллагаа явуулах боломжтой болгох чиглэл рүү хөнгөлөлттэй зээл чиглэхээр хандаж байна.

Хувийн хэвшлээс ойролцоогоор дөрөв орчим их наяд төгрөг гарч байж энэхүү хөрөнгө оруулалтуудыг бий болгоно гэж харж байгаа.

Цаашдаа энэхүү зээлийг тогтвортой тав орчим жилийн хугацаанд олгосноор энэ салбарын хөгжилд нөлөө үзүүлэхүйц зээлийн хөтөлбөр болно. 

Нөгөө талдаа нэг ам.доллар тутамд 6 орчим ам.долларын эдийн засгийн эргэлтийг бүрдүүлэх боломж байна гэсэн судалгаа гарсан. 2030 он гэхэд хоёр сая жуулчин авах боломж бүрдэнэ" хэмээв. 

"Журам гэхээс илүү арилжааны банкны шаардлагыг хангасан ААН-үүдэд зээл гаргана"

 

Гэрэл зургийг MPA агентлагийн онцгой зөвшөөрөлтэйгөөр ашиглав

Аялал жуулчлалын салбарт үйл ажиллагаа явуулдаг ААН, байгууллагуудад ямар шалгуур тавьж зээл олгох тухай сэтгүүлчийн асуултад Соёлын сайд Ч.Номин дараах хариултыг өгөв. 

Сэтгүүлч: Ямар шалгуураар зээл олгох вэ?

Соёлын сайд: Бид арилжааны банкуудын төлөөлөлтэй ярилцсан. Журам гэхээс илүү арилжааны банкны шаардлагыг хангасан ААН-үүдэд гаргана гэж үзэж байна.

Дөрвөн улирлын аялал жуулчлалыг хөгжүүлэх бодлоготой байгаа учраас байрших үйлчилгээ буюу зочид буудал, баазуудыг өвлийн улиралд ажиллах боломжтой чиглэл рүү илүүтэй зээл гаргана. 

Үүндээ таарсан нөхцөл шаардлагаа гаргаад, арилжааны банкууд шийдвэрлээд явна гэж үзэж байна. Улсын зүгээс зургаан хувь хүртэлх хөнгөлөлттэй зээл болгох дэмжлэгийг үзүүлэхээр тодорхойлж байгаа. 

Тавдугаар сарын 29-нд Аялал жуулчлалын хөгжлийн төвийг нээнэ. Энэ үеэр аялал жуулчлалын салбарт үйл ажиллагаа явуулж буй ААН-үүд, банкны салбарынхан ирнэ. Зээлийн ерөнхий мэдээллийг бүрэн танилцуулах юм. Ингэснээр зургаадугаар сарын 1-н гэхэд хэрэгжиж эхэлнэ.

Ойролцоогоор 200 тэрбум төгрөгийн эх үүсвэр энэ жилдээ гарна.