Л.Гантөмөр: АН засагт байлгаад өгөөч гэж хэзээ ч гуйхгүй. Гэхдээ МАН дангаараа засаглавал олонх, цөөнхийн зодоон руу буцаад орно

Гэрэл зургийг MPA агентлагийн онцгой зөвшөөрөлтэйгөөр ашиглав

Ардчилсан Намын дарга Л.Гантөмөр цаг үеийн нөхцөл байдалтай холбоотой сэтгүүлчдийн асуултад хариулт өглөө.

-МАН-ын Бага хурал өнөөдөр болох гэж байна. Хурлаас хамтарсан Засгийн газрын үйл ажиллагааг үргэлжлүүлэх үгүйг шийднэ. Үүнд та ямар байр суурь илэрхийлэх вэ?

-Монгол Ардын Нам өнөөдрийн хурлаараа Монголын эрх ашгийг бодож байна уу үгүй юу гэдгээ эргэж сайн хараад, дүгнэлтээ гаргах байх.

Миний сонссоноор “АН-ынхан хамтарсан мөртлөө Их хурлын гишүүд нь үг хэлээд байна” гэдэг зүйл ярьж байгаа юм билээ. АН бол олон ургалч үзэлтэй нам. Өөрийнх нь засаг байсан ч манай намын гишүүд шүүмжилдэг. Манай намын гишүүд өөрийнхөө ч Ерөнхий сайдыг шүүмжилдэг. Өөрийн өнгө төрхөөрөө л байгаа. Үүнийг МАН-ын нөхөд маань ойлгох хэрэгтэй. Хамтарлаа гээд намын гишүүдийнхээ амыг барина гэсэн үг биш.

Манай намын Улс төрийн зөвлөл мөн хуралдана. Зөвлөлийг УИХ-ын гишүүдээр өргөтгөөд энэ асуудлыг ярина.

-Хамтарсан Засгийн газрыг байгуулах үед гэрээ байгуулсан. Тус гэрээнд одоогийн үүсээд байгаа нөхцөл байдалтай холбоотой заалт байгаа юу?

-Бид итгэл үнэмшлээрээ хамтарсан. Тэр итгэл үнэмшил нь улсын эрх ашиг нэгдүгээрт гэдэг зүйл. Улсын эрх ашгаас урвасан тохиолдолд хамтарсан засаг тарна.

АН засагт байлгаад өгөөч гэж хэзээ ч гуйхгүй. АН улсынхаа эрх ашгаас хэзээ ч урвахгүй.

-Хамтарсан Засгийн газар 10 сар ажиллаа. Хурдтай хөгжлийн төлөө зориг мөрийн хөтөлбөрийг та хэрхэн дүгнэх вэ?

-Би маш бардам байгаа. Монголын асуудал шийдэгдэхгүй их удсан. Тиймээс бид хамтарсан засаг байгуулсан. Хамгийн олон жил маргасан төмөр замын хил холболтыг бид шийдсэн, эрчим хүчний асуудлыг шийдсэн мөнгийг нь босгосон, бензинтэй болох Монголчуудын олон жилийн мөрөөдлийн хөрөнгийг шийдсэн, Улаанбаатарыг утаагүй болгох нүүрс-химийн үйлдвэрийн эхлэлийг тавьсан. Мөн ураны асуудлаа шийдэж чадсан. Энэ бол Монголын түүхэнд үлдэнэ.

Харамсалтай нь өнөөдөр цэг тавигдах юм бол дараагийн алхам болох эрчим хүчний хангалтаа зузааруулж, үүнээс улбаалан үйлдвэртэй болох ажил тасалдана.

-МАН дангаараа Засгийн газраа бүрдүүлнэ гэвэл УИХ, Засгийн газар ямар нөхцөл байдалд орох вэ?

-Ер нь засаглалын хямралд орох нь тодорхой. Олонх, цөөнхийн хоорондох зодоон руу буцаад орно. Энэ бол баталгаатай.

МАН шийдвэрээ гаргаагүй байхад би олон юм яримааргүй байна. Хамтарсан Засгийн газрын Тэргүүн шадар сайд нь элдэв юм яриад зогсож болохгүй шүү дээ.

Шийдвэр гарах юм бол тэр үед үгээ хэлнэ.

Би АН-аас нэг л зүйл хүснэ. Улс орны эрх ашгийг нэгдүгээрт тавьдаг сэтгэлгээгээ хадгалж явахыг хичээгээрэй. Эв эе гэдэг бол Монгол төрийн том ухаан.

Эв эегүй бол Монголын парламент дайсагнал зодооноор цаашаа явахгүй. Ялангуяа сошиал асар түвшинд хөгжсөн энэ үед зодоон бол Монголыг хуваана.

-Өнөөдөр хуралдах танай намын Улс төрийн зөвлөл хамтарсан Засгийн газраас гар гэвэл яах вэ?

-Олон талаас нь ярих ёстой. Хоёр жилийн өмнө АН ямар байсныг бүгд мэднэ. Хоёр хуваагдсан, хоёр тамгатай. Зовлон үзсэн хүн илүү хүчтэй болох ёстой.

‑Танай нам сөрөг хүчин болбол яах вэ?

-Шүүмжлэлтэй хандлага нэмэгдэх байх. Хувь хүний итгэл үнэмшил бол улс орны эрх ашгийг нухчин дарах зүйл битгий хийгээсэй л гэж бодож байна.

-Тодорхой хувь хүн, компаниудын эрх ашгийн үүднээс энэ асуудал үүссэн гэдэг зүйл яригдаж байна. Та энэ дээр ямар байх суурьтай байна вэ?

-Олон зүйл бий. Асуудал шийдэгдсэний дараа олон хүн дуугарах байх. Ер нь Монголын зовлон юу гэвэл баялгийн хараал. Баялгийг ард түмэнд өгөх хүсэл зориг төрд байна уу үгүй юу гэдгээс их зүйл шалтгаална.