Нэр бүхий иргэд Ерөнхий сайд Л.Оюун-Эрдэнийн хүүтэй холбоотой асуудлыг шалгуулахаар АТГ-т ханджээ
Монгол Улсын Ерөнхий сайд Л.Оюун-Эрдэнийн хүү О.Тэмүүлэнгийн найз бүсгүй гэх эмэгтэйн цахим сүлжээнд нийтэлсэн зургууд сүүлийн өдрүүдэд олон нийтийн анхаарлын төвд ороод байгаа юм.
Тодруулбал 20 гаруй настай О.Тэмүүлэнг ямар орлогын эх үүсвэр ашиглаж найз бүсгүйдээ брэндийн цүнх, хувцас бэлэглэсэн талаар нотлохыг олон нийтийн зүгээс шаардаж байгаа билээ. Түүний аав ерөнхий сайд Л.Оюун-Эрдэнэ нийт нэг тэрбум төгрөгийн хөрөнгөтэй хэмээн ХАСХОМ дээрээ дурдсан байдаг.
Үүнтэй холбогдуулан иргэн Ц.Лут-Очир, Ш.Оюунбат нар тус асуудлыг шалгуулах талаар Авлигатай Тэмцэх Газарт өнөөдөр хандсан байна.
Энэ талаар иргэн Ц.Лут-Очир "Ерөнхий сайд Л.Оюун-Эрдэнэ болон түүний хүү О.Тэмүүлэн, худ ургийн холбоотой Ч.Өгөөдэйбаатар, Н.Ариунаа гэх хүмүүсийн хүүхдүүдийн тансаг байдал өөрсдийн хөрөнгө орлоготой огт нийцэхгүй байна. Үүнийг авлигаар санхүүжүүлсэн байж болзошгүй гэх мэдээлэл тархсан байгаа тул хуулийн дагуу АТГ шалгаж мухарлах ёстой" хэмээн өнөөдөр мэдээлэл өгөв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
