Финландын буланд зорчиж байсан Оросын байлдааны хөлөг Украины агаарын цохилтод өртжээ

Лхагва гарагт Балтийн тэнгисийн Финландын буланд Оросын байлдааны хөлөг онгоц цохилтод өртсөнийг Финландын албаны хүмүүс баталсан хэдий ч уг халдлагын талаарх мэдээлэл тун хомс байна.

Украины аюулаас хамгаалах алба СБУ мэдэгдэхдээ Балтийн тэнгисийн эрэгт оршдог Оросын Усть-Луга газрын тос экспортлох байгууламжийг чиглэсэн дроны томоохон ажиллагааны хүрээнд Наро-Фоминск байлдааны хөлөг онгоцыг онилсноо баталжээ.

Украины дронууд Балтийн тэнгисийн иргэний хөлөг онгоцны хөдөлгөөнд нээлттэй бүсэд Оросын байлдааны хөлөгт халдсан анхны тохиолдол гэж үзэж буй энэ үйл явдал нь Украин цаашид цохилтоо өргөжүүлж магадгүй гэсэн таамгийг төрүүлж байна.

Финланд улс нь Европын орнууд дотроос Киевийн хамгийн ойрын холбоотнуудын нэг бөгөөд тус улсын албаны хүмүүс энэ хэргийг Оросын явуулж буй эзлэн түрэмгийлэх дайны шууд үр дагавар гэж тодорхойлжээ.

Финландын цэргийнхэн уг цохилтын талаар дэлгэрэнгүй мэдээлэл өгөөгүй ч тус улсын эргээс зайтай, тэнгисийн нарийн зурвас хэсэгт болсон бололтой.

 

Тус улсын гадаад хэргийн сайд Элина Валтонен одоогоор Балтийн тэнгисийн нөхцөл байдал тогтвортой, аюулгүй хэвээр байгаа бөгөөд далайн тээвэрт ямар нэгэн аюул заналхийлэл байхгүйг онцолсон байна.

Харин батлан ​​хамгаалахын албаны хүмүүс уг булан нь газрын тос тээвэрлэгч болон иргэний хөлөг онгоцнууд ашигладаг харьцангуй нарийн усан зам төдийгүй далайн ёроолоор өгөгдөл дамжуулах кабелууд байрладаг газар гэдгийг Киевийн эрх баригчдад сануулсан бололтой.

Украины СБУ-ийн мэдээлснээр халдлагад өртсөн Оросын хөлөг онгоц нь Калибр болон Оникс далавчит пуужингаар зэвсэглэсэн "Буян-М" ангиллын жижиг байлдааны хөлөг байжээ. Мөн Оросын байлдааны нисдэг тэрэгнүүд устгагдсан тухай батлагдаагүй мэдээллүүд гарсан байна.

Тус булантай хиллэдэг Эстони улсын батлан ​​хамгаалахын сайд Мартин Херем олон нийтийн ERR сувгаар ярихдаа хөлөг онгоц Лхагва гарагийн 05:30 цагийн орчимд цохилтод өртсөнийг хэлсэн ч ямар төрлийн халдлага байсныг дурдаагүй юм. Тэрбээр "Халдлагын дараа хөлөг онгоцноос утаа гарч байсныг бид харсан. Хөлөг онгоц өөрөө Санкт-Петербург хот руу буцсан" гэж ярьжээ.

Оросын тэнгисийн цэргийн хөлөг онгоцонд учирсан хохирол, хүний ​​амь насны хохирлын хэмжээ тодорхойгүй байгаа бөгөөд Москва ийм төрлийн мэдээллийг бараг өгдөггүй юм.

"Балтийн тэнгисийн флот өнөөг хүртэл халдашгүй хэвээр байсан ч Украинд боломж гарч ирсэн бололтой, тэд ч үүнийг ашиглахыг оролдсон нь ойлгомжтой" гэж "Black Bird" хяналтын бүлгийг үүсгэн байгуулагчдын нэг, цэргийн шинжээч Эмил Кастехелми хэлжээ.

Орос улс 2022 оны хоёрдугаар сард түрэмгийлэл эхлүүлснээс хойш Хар тэнгист Орос болон Украины хөлөг онгоцнууд удаа дараа халдлагад өртөж байсан ч Балтийн тэнгисийн хөлгийг чиглэсэн энэ удаагийн халдлага нь урьд өмнө гарч байгаагүй тохиолдол юм.

Гэсэн хэдий ч Кастехелми үүнийг нөхцөл байдлыг ноцтой хурцатгасан үйл явдал гэж үзэхгүй байгаагаа ярьжээ.

Украины дронууд Оросын нутаг дэвсгэрийн гүнд байнга довтолж байгаа. Лхагва гарагийн шөнө Усть-Луга терминалын хэд хэдэн агуулах сав халдлагад өртсөн байж болзошгүй байгаа бөгөөд боомтод гарсан гал түймрийг хил залгаа Эстони улсаас ч харах боломжтой байв.

Херемийн мэдээлснээр Украины дронууд шөнө дундаас өглөөний 06:00 цагийн орчимд Усть-Луга бүс рүү довтолсон бөгөөд тэд ихэвчлэн Оросын агаарын орон зайд, Эстонийн хилтэй ойрхон нисэж байсан гэнэ.

Нэг дрон Латви улсын талаас Эстонийн агаарын орон зайд түр хугацаагаар нэвтэрч, улмаар Оросын нутаг дэвсгэрийг чиглэн цааш ниссэн тухай тэр нэмж хэлсэн байна.

Тухайн үед Балтийн орнуудад байрлаж буй НАТО-гийн сөнөөгч онгоцнууд агаарт байсан ч дронуудыг устгах нь аюултай гэж үзсэн тул ийм алхам хийгээгүйг Херем тайлбарлажээ.

Лхагва гарагийн орой Украины гадаад хэргийн яамны хэвлэлийн төлөөлөгч Георгий Тихий гаргасан мэдэгдэлдээ Орос руу довтлохдоо Балтийн орнуудын агаарын орон зайг ашигласан гэх Москвагийн буруутгалыг "үндэслэлгүй" хэмээн няцаасан байна. Гэхдээ тэр "Орос улс цахим дайны хэрэгсэл ашиглан дронуудыг өөрийн агаарын орон зайгаас өөр тийш чиглүүлэх үед янз бүрийн тохиолдол гарч болзошгүй" гэдгийг хүлээн зөвшөөрсөн байна.

Эх сурвалж: Reuters