Гал зогсоох төлөвлөгөөний талаар дэлгэрэнгүй мэдээллийг АНУ-аас хүлээж байгаагаа Кремлийн төлөөлөгч мэдэгдэв

Мягмар гарагт Саудын Арабын Жедда хотод болсон уулзалтын үр дүнд АНУ-ын дэвшүүлсэн 30 хоногийн хугацаанд гал зогсоох төлөвлөгөөг Украин улс зөвшөөрснөө мэдэгдээд байгаа.

Үүнийхээ хариуд түр зогсоод байсан АНУ-ын зэр зэвсгийн тусламжийг Украины тал үргэлжлүүлэн авахаар болсон байна. Одоо гал зогсоох гэрээний хувь заяаг Оросын тал шийдэх болоод байгаа.

Өчигдөр буюу Лхагва гарагт Кремлийн хэвлэлийн төлөөлөгч Дмитрий Песков “Өчигдөр Жедда хотод мэдэгдсэнчлэн төрийн нарийн бичгийн дарга Рубио, үндэсний аюулгүй байдлын зөвлөх Уолц нар төлөвлөгөөний дэлгэрэнгүй мэдээлэл болон ойрын өдрүүдэд хүрсэн ойлголцлын талаар бидэнд ямар нэг сувгаар мэдээлэл өгнө гэдэгт найдаж байна” гэж хэлжээ.

Уулзалтын дараа АНУ, Украины төлөөлөгчдийн гаргасан хамтарсан мэдэгдлийн агуулгыг Москвагийн албаныхан нягтлан судалж байгааг тэр энэ үеэр бас мэдээлсэн юм.

Жедда хотод 10 цаг орчим хугацаанд үргэлжилсэн уулзалтын дараа АНУ-ын төрийн нарийн бичгийн дарга Марко Рубио “Одоо бөмбөг Оросын талбайд байна” гэж хэлж байв.

Өчигдөр АНУ-ын ерөнхийлөгч Дональд Трамп төлөвлөгөөнийхөө талаар ойрын үед ОХУ-ын ерөнхийлөгч Путинтэй утсаар ярих гэж байгаагаа мэдэгдсэн юм.

Нөгөө талаас хоёр ерөнхийлөгч нүүр тулан уулзах цаг хугацаа, газар орны асуудлаар талууд ямар нэг тохиролцоонд хүрээгүй байгааг Песков өчигдөр баталжээ.

Москвагийн зарим эх сурвалжийн мэдээлж байгаагаар 30 хоног гал зогсоох АНУ-ын төлөвлөгөөг Путин одоогийн хэлбэрээр нь хүлээж авахад хүндрэлтэй байгаа гэнэ.

“Оросын арми тулааны талбарт давуу байдалтай байгаа тул Путин үүнийг шууд зөвшөөрөхгүй байх” гэж албаны эх сурвалж хэлснийг Ройтерс агентлаг өчигдөр уламжилжээ.

Трампын бие төлөөлөгч Стив Виткоф өнөөдөр буюу Пүрэв гарагт Москва хотноо ерөнхийлөгч Путинтэй уулзаж магадгүйг Өрнөдийн зарим эх сурвалж мэдээлсэн байна.

Энэ талаар сэтгүүлчид асуухад Песков “тодорхой болох үед нь нийтэд мэдээлнэ” гэж хариулжээ.

Лхагва гарагийн орой хийсэн ээлжит мэдэгдэлдээ Украины ерөнхийлөгч Володимир Зеленский одоо АНУ-ын тал гал зогсоох төлөвлөгөөгөө Оросын талаар зөвшөөрүүлэх шаардлагатайг онцолсон байна.

Эх сурвалж: AFP