Оросын тусгай хүчнийхэн хийн хоолойгоор дамжин Украины эсрэг довтолгоо явуулсныг эх сурвалжууд мэдээллээ

ОХУ-ын Курск мужийн зарим хэсгийг хяналтдаа байлгаж буй Украины цэргүүдийн эсрэг Оросын тусгай хүчнийхэн өвөрмөц аргаар гэнэтийн довтолгоо явуулсан тухай Кремлийн бодлогыг дэмждэг блогчид мэдээлжээ.

Тухайлбал тэд Суджа хотын ойролцоо оршдог хий дамжуулах хоолой дотуур хэдэн өдрийн турш олон километр зайд урагшилж, Украины цэргүүдийн ар талд гарсан гэнэ.

ОХУ-ын батлан хамгаалах яам өчигдөр Курскийн нөхцөл байдлын талаар мэдээлэхдээ энэ ажиллагааны үр дүнд тусгай хүчнийхэн Лебедевка тосгоныг буцаан авч, хилийн цаана орших Украины Сумы мужийн Новенке тосгоныг эзэлсэн тухай мэдээлжээ.

Суджа бол Оросын байгалийн хийг Украинаар дамжуулан Европын зах зээлд гаргадаг дамжуулах системийн төв юм.

Оросын зарим Телеграм сувгууд хийн баг, гэрэл зүүсэн тусгай хүчнийхэн хоолой дотуур явж байгааг харуулсан гэрэл зураг, дүрс бичлэгийг нийтэлсэн байна.

 

Украины зэвсэгт хүчний жанжин штаб Оросын цэргүүд хийн хоолойгоор довтолсон ч тэднийг шуурхай илрүүлж, их буу, пуужин, нисгэгчгүй онгоцоор устгасан тухай мэдээлжээ.

Украины цэргүүд өнгөрсөн оны наймдугаар сард Курск мужид нэвтэрч, багагүй хэмжээний нутаг дэвсгэрт хяналтаа тогтоосон нь 1941 оны Нацист Германы түрэмгийллээс хойш Орос улсын газар нутагт анх удаа гадаадын зэвсэгт хүчин халдсан тохиолдол болж байв.

Сүүлийн үед Украины арми Курскийн нутгаас шахагдаж эхлээд байгаа. Үүнд АНУ зэр зэвсгийн тусламж, тагнуулын мэдээлэл өгөхөө зогсоосон нь бас нөлөөлж буй.

Зөвлөлтийн үед байгуулагдсан Уренгой-Помары-Ужгород хоолой нь баруун Сибирийн байгалийн хийг Суджагаар дамжуулан Украины нутагт хүргэдэг байв.

Дайны өмнө байгуулагдсан гэрээний хугацаа дууссан үндэслэлээр энэ оны нэгдүгээр сарын нэгнээс эхлэн Украин улс Оросын хийг нутаг дэвсгэр дээгүүрээ дамжуулахыг бүрэн зогсоосон юм.

Эх сурвалж: Reuters