Украины ерөнхийлөгч АНУ-ын ерөнхийлөгч, дэд ерөнхийлөгч нартай ширүүн мэтгэлцсэний дараа Цагаан ордноос хөөгдөв

Баасан гарагт АНУ-д айлчилсан Украины ерөнхийлөгч Володимир Зеленский ерөнхийлөгч Дональд Трамптай тун ширүүн уур амьсгалд уулзсаныхаа дараа шууд утгаараа Цагаан ордноос хөөгдөн гарлаа.

Хэвлэл мэдээллийн хэрэгслүүдийн дурангийн өмнө болсон энэ үйл явдал дэлхий нийтийг алмайруулаад байна.

АНУ-д айлчилсан гадаад улсын төрийн тэргүүний жишгээр Цагаан ордны баруун жигүүрийн хаалган дээр Дональд Трамп хүндэт зочноо угтаж авсан юм.

Зууван танхимд орсныхоо дараа Зеленский өөрийн улсын мэргэжлийн боксчин Олександр Усикийн дэлхийн аваргын бүсийг АНУ-ын ерөнхийлөгчид бэлэглэжээ.

Гэвч үүнээс хойш хэдхэн минутын дараа Цагаан ордонд урьд өмнө хэн ч харж байгаагүй үйл явдал өрнөсөн юм.

Эхлээд ерөнхийлөгч Трамп, дэд ерөнхийлөгч Жэй Ди Вэнс нар АНУ-ын тусламж дэмжлэгт хангалттай талархахгүй байгаа Зеленскийг шүүмжилж эхэлжээ.

Вэнс энэ үеэр Зеленскийд “дайныг дипломат арга замаар зогсоох ёстой” гэж хэлснээр асуудал хурцадсан юм.

Хариуд нь Зеленский “яг ямар дипломат арга” яриад байгааг Вэнсээс асуусан байна.

Хариуд нь Вэнс түүнийг хүндэтгэлгүй харилцаж байгааг нь шүүмжилж, ерөнхийлөгч Трампын хүчин зүтгэлд талархал илэрхийлэхийг шаарджээ.

Маргаанд Трамп оролцохдоо “Чи хангалттай ярилаа. Ингээд ч дийлэхгүй”, “Чи талархах ёстой. Чиний гарт хөзөр алга” гэх зэргээр Зеленскийг зэмлэсэн юм.

“Би хөзөр тоглоогүй. Би нухацтай ярьж байна, ноён Ерөнхийлөгч. Би бол дайны байдалд байгаа ерөнхийлөгч” гэж Зеленский түүнд хариулжээ.

Трамп “Чи дэлхийн гуравдугаар дайнаар бооцоо тавьж байна” гэж түүнд хэлсэн байна.

“Маш олон хүний хоосон ярианаас илүү таныг дэмжсэн улс орныг хүндэтгэхгүй байна. Энэ уулзалтын турш та нэг удаа баярлалаа гэж хэлсэн билүү? Үгүй” гэж Вэнс энэ үеэр хэлж байлаа.

Удалгүй Украины төлөөлөгчдийг Зууван танхимаас гаргаж, Зеленский ч Цагаан ордноос явсан байна.

Уулзалтын дараа төлөвлөгдсөн байсан ашигт малтмалын гэрээнд гарын үсэг зурах ёслол, хамтарсан хэвлэлийн хурал цуцлагджээ.

Үүнээс хойш хэдэн минутын дараа Трамп сошиал хуудсандаа “энхийн гэрээ байгуулахад бэлэн болсныхоо дараа ирээрэй” гэсэн өгүүлбэрийг Зеленскийд хаяглан бичсэн юм.

Зеленский бас сошиал хуудсандаа өнөөдрийг хүртэл тусалж дэмжиж ирсэн АНУ-ын засаг захиргаа, ард түмэнд талархаж байгаагаа илэрхийлснээс гадна бусад холбоотон улсуудын удирдагчдад талархлын зурвас илгээжээ.

Цагаан ордонд болсон уулзалтын дараа Европ болон Канадын удирдагч нар Украиныг дэмжиж байгаагаа ээлж дараалан мэдэгдсэн юм.

Тухайлбал Их Британийн ерөнхий сайд Кэйр Стармер уулзалтын дараа шууд Трамп, Зеленский нартай тус тусад нь утсаар ярихдаа “Украиныг тууштай дэмжиж, Украины тусгаар тогтнол, газар нутгийн бүрэн бүтэн байдалд тулгуурласан энх тайван тогтоохын төлөө бүх боломжоо дайчлан ажиллахыг амласан” тухай Лондон хотоос мэдээлжээ.

Тэрбээр Ням гарагт Зеленский болон олон улсын төрийн тэргүүнүүд оролцсон хурлыг Лондонд зохион байгуулах болсноо зарласан байна.

Францын ерөнхийлөгч Эммануэл Макрон “Орос бол эзлэн түрэмгийлэгч. Украин бол хохирогч улс. Бидний Украинд тусалж байгаа нь зөв гэдэгт би итгэлтэй байна. Үүнийгээ үргэлжлүүлэх болно” гэж мэдэгджээ.

Европын Комиссын ерөнхийлөгч Урсула фон дер Ляйен “Хүндэт ерөнхийлөгч та хэзээ ч ганцаардахгүй. Бид бүгд энх тайвны төлөө тантай үргэлжлүүлэн хамтрах болно” гэж Зеленскийд хандан бичсэн байна.

Канад, Польшийн удирдагчид мөн Украиныг үргэлжлүүлэн дэмжихээ амлажээ.

Харин ОХУ-ын ерөнхийлөгч асан Дмитрий Медведев “Зеленский эцэст нь хүртэх ёстойгоо хүртэж, Зууван танхимд алгадууллаа. Ерөнхийлөгч Трампын зөв: Киевийн дэглэм дэлхийн гуравдугаар дайнаар бооцоо тавин тоглож байна” гэж сошиал хуудсандаа бичсэн юм.

Цагаан ордны гадна сэтгүүлчидтэй уулзахдаа Трамп дахин яриа хэлэлцээ хийхээр Зеленский буцаж ирэх хүсэлтэй байгаа ч одоохондоо түүнийг хүлээж авах боломжгүйг хэлжээ.

“Бид дахиж маргахгүй. Бид нэг бол дайныг дуусгана, үгүй бол тэд өөрсдөө үргэлжлүүлэх болно” гэж Трамп энэ үеэр хэлсэн юм.

Уулзалтын дараа Fox News сувагт өгсөн ярилцлагадаа Зеленский “Аюулгүй байдлын баталгаагүй зүгээр л гал зогсоох нь манай ард түмний хувьд маш эмзэг асуудал. Би болон Украины ард түмэн Америкчууд Оросын талд биш манай талд байгааг сонсохыг хүсэж байна” гэж хэлжээ.

“Ийм хэрүүл маргаан аль аль талдаа сайн зүйл биш. Би маш нээлттэй байхыг хичээж байна. Гэхдээ би Оросын талаар Украинчуудын хандлагыг өөрчилж чадахгүй. Тэд бол алуурчид” гэж тэр цааш нь хэлсэн юм.

Цагаан ордонд гаргасан үйлдлийнхээ төлөө ерөнхийлөгч Трампаас уучлалт гуйх эсэхийг нь асуухад Зеленский шууд хариулахаас зайлсхийж, “Би ноён ерөнхийлөгч болон Америкийн ард түмэнд хүндэтгэлтэй ханддаг. Бид маш ил тод, маш нээлттэй байсан гэж би бодож байна. Бид тийм муухай зүйл хийгээгүй байх” гэж хариулжээ.

Эх сурвалж: BBC