104 хууль бус цагаачийг тээвэрлэсэн АНУ-ын армийн нисэх онгоц Энэтхэгт газарджээ

Хууль бус цагаачдыг албадан гаргах ерөнхийлөгч Трампын засаг захиргааны хэрэгжүүлж буй арга хэмжээний хүрээнд өчигдөр 104 зорчигчтой АНУ-ын армийн нисэх онгоц Энэтхэг улсад газарджээ.

C-17 загварын ачааны онгоц Техас мужийн Сан-Антонио хотоос хөөрч, Энэтхэгийн хойд бүсийн Амритсар хотод ирсэн байна.

Энэ нь АНУ-д хууль бусаар оршин сууж байсан Энэтхэгийн иргэдийг буцаах эхний нислэг юм.

Ирэх долоо хоногт Энэтхэгийн ерөнхий сайд Нарендра Модигийн АНУ-д хийх айлчлалын өмнө уг нислэгийг зохион байгуулж байна.

Хоёр улсын удирдагчид өнгөрсөн долоо хоногт утсаар ярилцахдаа цагаачдын асуудлыг хөндсөн тухай албаны эх сурвалжууд мэдээлж байсан юм.

Pew Research Center байгууллагын тооцоолсноор одоо АНУ-д Энэтхэгийн 725,000 иргэн хууль бусаар оршин суудаг гэдэг.

Энэ нь Мексик, Сальвадорын дараа гуравт орох том үзүүлэлт юм.

Гэхдээ зарим судлаачид энэ тоог эргэлзээтэй, бодит байдлаас хоёр дахин өндөр байж магадгүй гэж үздэг.

Өнгөрсөн онд АНУ-ын засаг захиргаа 1,000 гаруй Энэтхэгийн иргэнийг зорчигч тээврийн хуваарьт нислэгээр албадан буцааж байжээ.

Албадан буцаалтад өртөг өндөртэй цэргийн нисэх онгоц ашиглах нь сүр үзүүлэх бэлгэдлийн чанартай үйлдэл гэж ажиглагчид үзэж байна.

Зарим эх сурвалжуудын тооцоолсноор ердийн зорчигч тээврийн нислэг ашигласнаас энэ нь тав дахин өндөр зардалтай ажээ.

АНУ-ын армийн нисэх онгоцоор Гватемал, Перу, Хондурас, Эквадор улсууд руу иргэдийг нь буцаах нислэг үйлдээд байгаа.

Иргэдэд нь хүнлэг бус хандсан энэ үйлдлийг эсэргүүцсэн Колумбын ерөнхийлөгч Густаво Петро өнгөрсөн сард АНУ-ын илгээсэн хоёр онгоцыг хүлээж авахаас татгалзаж байв.

Гэвч Трампыг худалдааны дайнаар сүрдүүлсний дараа энэ маргаан шийдвэрлэгдсэн юм.

Энэтхэгийн хэвлэлүүдийн мэдээлснээр бол одоо тус улсын 18,000 орчим иргэн АНУ-аас албадан буцаагдах жагсаалтад ороод ээлжээ хүлээж байгаа гэнэ.

Энэтхэгийн засгийн газар уг ажиллагааг дэмжиж ажиллахад бэлэн байгаагаа саяхан илэрхийлж байв.

Харин өчигдрийн нислэгийг хүлээж авсан Пунжаб мужийн засаг захиргааны тэргүүн Кулдэп Сингх Даливал цагаачдыг албадан буцаах Трампын засаг захиргааны үйл ажиллагаанд илүү хатуу хандахыг Модигийн засгийн газарт уриалжээ.

“Энэтхэгийн холбооны засгийн газар үүнд маш нухацтай хандах ёстой. Тэд гэмт хэрэгтнүүд биш. Тэд хууль бусаар амьдарч байсан байж болох ч энэ нь амьжиргаагаа сайжруулахын төлөө юм. Ерөнхийлөгч Трамп хүнлэг ёсны үүднээс тэдэнд дахин нэг боломж олгох ёстой” гэж тэр мэдэгдсэн байна.

Энэтхэгийн технологийн мэргэжилтнүүдийн хувьд ч АНУ-д цагаачлах боломж багасаж магадгүй байгаа.

Трампыг тангараг өргөснөөс хойш Энэтхэгийн хиндү шашны сүм хийдүүд АНУ-ын виз олж авахыг хүссэн мөргөлчдөөр дүүрэх болсон гэдэг.

Эх сурвалж: Associated Press