Омега-3 тосны хүчлийг өдөр тутам хэрэглэвэл хөгшрөх үйл явц удааширдаг байж болзошгүй нь туршилтаас харагджээ

Хүний эрүүл амьдралыг уртасгах зорилгын хүрээнд явуулсан туршилтаар омега-3 тосны хүчил нь хөгшрөлтийн үйл явцыг удаашруулдаг байж болзошгүй гэсэн дүгнэлт гарчээ.

Тухайлбал туршилтад оролцсон эрүүл өндөр настнуудад гурван жилийн турш өдөр бүр нэг грамм тосны хүчил уулгахад хөгшрөх үйл явцыг илэрхийлдэг нэг үзүүлэлт гурван сарын хугацаагаар удааширсан байна.

Үүн дээр нэмээд D витамин өгч, байнгын дасгал хөдөлгөөнөөр хичээллүүлэхэд энэ хугацаа дөрвөн сар орчим болж сунаж байжээ.

Дээрх туршилтыг ахалсан Цюрихийн Их сургуулийн эрүүл урт наслалт судлалын профессор Хайке Бишофф-Феррари “Гурван жилийн хугацаанд биологийн насыг гурваас дөрвөн сараар залуужуулж байгаа нь харьцангуй бага нөлөө байж магадгүй. Гэхдээ урт хугацаанд хэрэгжүүлбэл хүн амын эрүүл мэндэд мэдэгдэхүйц нөлөө үзүүлж болох юм” гэж дүгнэжээ.

Өмнөх судалгаануудаар загасны мах болон самар, үр тариа зэрэг бусад хүнсний бүтээгдэхүүнүүдэд агуулагддаг ханаагүй тосны хүчил болох омега-3 нь хөгшрөлтийн үйл явцад нөлөөлдөг байж болзошгүй нь тогтоогдож байсан.

Гэхдээ энэ удаагийнх шиг бодитой үр дүн харуулж байгаагүй юм.

Судлаачид Швейцарт оршин суудаг 70 ба түүнээс дээш настай 800 орчим хүнийг туршилтдаа оролцуулжээ.

Оролцогчдыг найман бүлэгт хувааж, бүлэг тус бүрийг өдөр бүр замгаас гаргаж авсан нэг грамм омега-3 өгөх, олон улсын хэмжүүрээр 2,000 нэгж D витамин өгөх, долоо хоногийн гурван өдөр 30 минутын дасгал хийх гэсэн гурван аргыг янз бүрийн холимог хувилбараар туршсан байна.

Ингэхэд омега-3 хүчил нь хүний биологийн насыг тодорхойлдог гурван өөр эпигенетикт сайнаар нөлөөлсөн бол D витамин, дасгалын хувилбарыг нэмэхэд нэг эпигенетикт эергээр нөлөөлж буй нь харагджээ.

Эпигенетик нь хүний ДНХ дэх биологийн насжилтад нөлөөлдөг “methylation” хэмээх химийн бодисыг хэмждэг үзүүлэлт юм байна.

Швейцарын судлаачдын туршилтын тайлан “Nature Aging” анагаах ухааны сэтгүүлд өчигдөр нийтлэгджээ.

Туршилтад оролцоогүй бусад судлаачид энэхүү үр дүнгийн талаар янз бүрийн сэтгэгдэлтэй байна.

“Миний бодлоор одоогийн 70 нас хуучны 50 нас болсон. Энэ арга хөгшрөлтийн эсрэг эмчилгээ болохгүй нь ойлгомжтой. Гэхдээ омега-3, D витамины бага тун, тогтмол дасгал хөдөлгөөн үр дүнтэй гэсэн миний итгэл үнэмшлийг улам бататгаж өглөө” гэж Кэмбрижийн Их сургуулийн Алтос Лабораторийн судлаач Стив Хорват ярьжээ.

Эссексийн Их сургуулийн хүний генетикийн профессор Леонард Шалквик “ДНХ-ийн метилжилт нь хүний арьс шиг нас ахих тусам өөрчлөгддөг зүйл. Энэ үзэгдэл хөгшрөлтөөс хамааралтай эсэх нь бүрэн тогтоогдоогүй байгаа тул туршилтад хамрагдсан хүмүүсийг залуужсан гэж хэлэх боломжгүй юм” гэж дүгнэсэн байна.

Эх сурвалж: The Guardian