Л.Энх-Амгалан: Цагаан сар, наадмаар 7-10 хоног амардаг болох судалгааг ЗГ-т танилцуулна. Харин энэ сар шинийн баяраар гурав хоног амарна

Гэрэл зургийг MPA агентлагийн онцгой зөвшөөрөлтэйгөөр ашиглав

Ирэх могой жил шинийн 1-ний өдөргүй тул билгийн тооллын шинэ оныг шинийн 2-ноос эхлэх тухай зурхайн болон шинжлэх ухааны үүднээс тооцоолсон хүмүүсийн тайлбарыг өмнө нь мэдээлсэн.

Нийтээр тэмдэглэх баярын болон тэмдэглэлт өдрүүдийн тухай хуульд билгийн тооллын хаврын тэргүүн сарын шинийн 1, 2, 3-ны өдрийг нийтээр тэмдэглэх баярын өдөр хэмээн заасан байдаг.

Энэ жилийн тухайд шинийн 2, 3-ний өдөр гуравдугаар сарын 1, 2-н буюу Бямба, Ням гарагт тохиож буй.

Үүнтэй холбоотойгоор энэ сар шинийн баяраар хэд хоног амрах вэ, шинийн 3-нд тооцогдох байсан Даваа гараг амралтын өдөр мөн үү гэдэг асуулт иргэдийн дунд яригдсаар байгаа. Мөн энэ асуултаас үүдэн уламжлалт сар шинийн баярын өдрүүдийг олон болгох саналууд ч нийгмийн зүгээс гараад буй.

Тэгвэл энэ асуудалд холбогдох яамны зүгээс шийд гаргахаар ажиллаж байгаа талаар салбарын сайд хэллээ.

Гэр бүл, хөдөлмөр, нийгмийн хамгааллын сайд Л.Энх-Амгалан "Нийтээр тэмдэглэх баярын тухай хуульд зааснаар бид 16 хоног амардаг. Тэр 16 хоногт үр ашиггүй амрах уу эсвэл наадам, цагаан сараар арай илүү урт амрах уу гэдэг дээр тооцоо судалгаа хийж байна. Судалгааг ирэх долоо хоногийн Засгийн газрын хуралд танилцуулна.

Жишээ нь, энэ цагаан сарын амралт хагас, бүтэн сайнд таарч байгаа. Гэтэл хуульд заасан амралтын өдрүүд байдаг. Хуульд заасан амрах ёстой өдрүүд Бямба, Ням гарагт таарвал шилжүүлж тооцох уу үгүй юу гэдгийг иргэд ярьж байна. Бусад улсуудад шилжүүлж тооцдог юм билээ.

Магадгүй цагаан сар, наадмаар 7-10 хоног амардаг тогтолцоонд орвол яасан юм бэ гэдэг дээр манай яам судалгаа хийж байна. Үүнийг ирэх Засгийн газрын хуралдаанд танилцуулна. 

Хоёрдугаарт, өвөл, зуны цагийн хуваарь. Зун нь эрт ажиллаад, эрт амардаг гэх мэтчилэнгээр зохицуулдаг жишиг бусад улсуудад бий. Ийм тогтолцоонд шилжих нь бүтээмжийг нэмэгдүүлэх боломжтой. Ерөнхий сайдын өгсөн үүргийн дагуу эдгээр асуудлыг судлан танилцуулах болно.

Ер нь бид энэ асуудлуудаар судалгаа хийсэн. Тэгэхэд сар шинийн битүүн, шинийн 1, 2, 3, 4-нийг амралтын өдөр болгоё. Шинийн 1, 2, 3, 4-н амралтын өдөр таарах юм бол дараагийн ажлын өдөрт шилжүүлж тооцдог байя гэдэг санал иргэдээс гарч байсан.

Тэгэхээр цагаан сараар амралтын өдрийг оролцуулаад 7 хоног, наадмаар 7-9 хоног амардаг болбол иргэдэд ч амар, дотоодын эдийн засагт ч үр нөлөөтэй байж болно гэдэг судалгаа гарсан.

Энэ жилийн тухайд УИХ-ын чуулган завсарласан тул хуульд өөрчлөлт оруулах боломжгүй. Хуульд заасан гурав хоногоороо амарна" гэв.