• 12 сарын 14, Бямба
|
Уншиж байна ...

Ерөнхийлөгчийн тавьсан хоригийг хэлэлцэх дэгийн тухай хуулийн төслийг УИХ дэмжсэнгүй

Н.Эрхбаяр, iKon.mn
2024 оны 11 сарын 29
iKon.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

Монгол Улсын 2025 оны төсвийн тухай хууль болон хамт баталсан хууль, тогтоолд бүхэлд нь тавьсан ерөнхийлөгчийн хоригийг Монгол Улсын Их Хурал хүлээж авсан.

Үүнтэй холбогдуулан УИХ-ын чуулганы өнөөдрийн үдээс өмнөх хуралдаанаар 2025 оны төсвийн хууль, тогтоолд нэмэлт, өөрчлөлт оруулах асуудлыг хэрхэн хэлэлцэх дэгийн тухай хуулийн төслийг хэлэлцлээ. 

Хуулийн төслийг Ёс зүй, дэгийн байнгын хороо боловсруулсан бөгөөд ажлын хэсэг хоёр удаа хуралдсан байна. Монгол Улсын Их Хурлын чуулганы хуралдааны дэгийн тухай хуулийн 16 дугаар зүйлд заасан “Хуралдааны дэгээр зохицуулаагүй асуудлыг хэлэлцэх журам”-ыг баримтлан хуулийн төсөл боловсруулж, энэ сарын 28-ны өдөр Ёс зүй, дэгийн болон Хууль зүйн байнгын хорооны хамтарсан хуралдаанд танилцуулжээ.

Монгол Улсын 2025 оны төсөвт тавьсан ерөнхийлөгчийн хоригийг хэлэлцэх дэгийн тухай хуулийн төслийг эцэслэн батлах санал хураалт явуулахад нийт гишүүний олонх нь дэмжсэнгүй.

Улсын Их Хурлын чуулганы хуралдааны дэгийн тухай хуулийн 90 дүгээр зүйлийн 90.8, 90.9 дэх заалтыг баримтлан Ёс зүй, дэгийн болон Хууль зүйн байнгын хороо хамтарсан хуралдаанаа хийж, холбогдох асуудлыг хэлэлцэхээр боллоо. УИХ-ын чуулганы үдээс хойших хуралдаанаар дээрх асуудлыг үргэлжлүүлэн хэлэлцэнэ.

Монгол Улсын Их Хурлын чуулганы хуралдааны дэгийн тухай хуулийн 44 дүгээр зүйлийн 44.2-т “Нэгдсэн хуралдаанд хуулийн төслийг эцэслэн батлах санал хураалт явуулах бөгөөд Улсын Их Хурлын нийт гишүүний олонх дэмжсэн бол эцэслэн баталсанд тооцно” гэж заасан байдаг аж.

Видео:

https://www.facebook.com/100064382633728/videos/1030417142432074