"Чингис Хаан: Монголчууд дэлхийг өөрчилсөн нь" үзэсгэлэн шилдгээр шалгарчээ

Монгол,Франц улсын Ерөнхийлөгч нарын ивээл дор Чингис хаан Үндэсний музейгээс хамтран Францын Нант хотод зохион байгуулсан “Чингис хаан: Монголчууд дэлхийг өөрчилсөн нь” үзэсгэлэн Францын алдарт Historia сэтгүүлийн 2024 оны "Шилдэг үзэсгэлэн" шагналыг хүртлээ.

1909 оноос хойш түүхийн чиглэлээр үйл ажиллагаа явуулж байгаа Historia сэтгүүл нь 2010 оноос эхлэн үйл ажиллагаа, үзэсгэлэн, кино, шоу урлаг зэрэг салбарт түүх бүтээхэд оролцож байгаа үйл явдлыг онцлох зорилгоор нэрэмжит шагналаа гардуулж эхэлжээ.

Шагналыг салбарын нэр хүндтэй шүүгчдийн бүрэлдэхүүн болон Historia сэтгүүлтэй хамтран шүүдэг аж. 

Энэ жил түүхэн ном, түүх уншигчдын шагнал, жүжиг, комик зураг, үзэсгэлэн, дэлгэц, инновац, шилдэг гэсэн найман сэдвээр сонгон шалгаруулалт явуулсан байна.

Шүүгчдийн зүгээс уг үзэсгэлэнг Монголын түүх болон Их эзэн Чингис хааны тухай Франц төдийгүй Европт гарсан чухал үзэсгэлэн байсныг онцолж, Монголын түүхээс гадна Pax Mongolica-г дэлхийн түүхэнд урьд хожид байгаагүй худалдааны өндөр ач холбогдолтой даяарчлал гэж өнөө үед үзэж болохыг дэлгэн харуулсан хэмээн онцлов..

Сонирхуулахад Чингис хаан Үндэсний музей нь 2024 онд АНУ-ын Үндэсний Газарзүйн нийгэмлэгийн сэтгүүлээс гаргасан очиж үзэх ТОП-20 газрын нэгээр шалгарсан билээ.
 

Эх сурвалж: Чингис Хаан Үндэсний Музей