Д.Хүрэлмаа: Эрэгтэй хүүхдийн хоол тэжээлийн үзүүлэлт доогуур, эндэгдэл их байна
"Нийгмийн үзүүлэлтийн түүвэр судалгаа-2023" нэгдсэн үр дүнгийн талаар танилцуулах арга хэмжээ өнөөдөр боллоо.
Тус судалгааг таван жил тутамд нэг удаа авдаг бөгөөд энэ удаа Үндэсний Статистикийн Хороо, Нэгдсэн Үндэстний Байгууллага (НҮБ)-ын Хүүхдийн Сан, НҮБ-ын Хүн Амын Сан хамтран хийсэн байна.
Судалгаанд улсын хэмжээнд нийт 12,438 өрх хамрагдаж, 151 үзүүлэлтээр мэдээлэл цуглуулан үр дүнг нэгтгэсэн аж. Хүүхэдтэй холбоотой авсан судалгааны үр дүнгийн талаар НҮБ-ын Хүүхдийн сангийн төлөвлөлт, хяналт үнэлгээний мэргэжилтэн Д.Хүрэлмаа мэдээлэл өглөө.
Тэрбээр "Өрхөд суурилсан судалгаа гэдэг нь мэдээллийн маш чухал эх үүсвэр юм. Энэ судалгааг манай улс таван жилд нэг удаа хийдэг бөгөөд хүүхэд, залуучууд, өрх гэрт төрийн суурь үйлчилгээ хэрхэн хүрч буйг олж хардаг онцлогтой.
Цар тахлын жилүүдэд хүүхэд, өрхийн нөхцөл хэвийн байдалтай байгаа. Огцом муудсан зүйл ажиглагдахгүй байгаа хэмээн ерөнхийд нь дүгнэсэн. Гэхдээ хоол тэжээлийн үзүүлэлтээс харвал таргалалт, өсөлт хоцролт нэмэгдсэн байна.
Бага насны цөөн хүүхдийн хооллолт зохистой хэмжээнд явагдаж байна. Судалгаанд хамрагдсан хүүхдийн дийлэнх нь зохистой нэр төрлийн хоолоор давтамжтай хооллож чадахгүй байгаа. Үүнд өрхийн амьжиргааны түвшин маш их нөлөөтэй.
"Хөдөө амьдардаг эрэгтэй хүүхдүүд суурь боловсрол эзэмшсэний дараа сургуулиас гарч байна"
Үргэлжлүүлэн боловсролын асуудлын талаар тэрбээр "Цэцэрлэгийн хамрагдалт хот суурин газар нэмэгдсэн. Хүүхдүүдийг цахимаар хичээллүүлсэн учраас Боловсролын яамнаас боломжтой байгууламжийг цэцэрлэг болгох ажил хийсэн.
Цэцэрлэг нь бага боловсролыг эзэмшихэд сайн суурь тавих ач холбогдолтой. Гэтэл хүүхдүүд цэцэрлэгт хамрагдаж, нийгэмшиж чадахгүй үедээ хөлөө олохгүй удах, сурлага нь хоцрох эрсдэлүүд бий болж байсан. Мөн хөдөө орон нутгийн хүүхдүүдийн цэцэрлэгт хамрагдалт бага байгаа юм.
Түүнчлэн хүүхдүүдийн 98 хувь нь бага боловсрол эзэмшиж байна. Цаашлаад дунд, ахлах ангид орох тусам хүүхдүүд аажмаар гээгддэг. Суурь боловсрол эзэмшсэний дараа хөдөө амьдардаг эрэгтэй хүүхдүүд сургуулиас гарч байна. Энэ нь нийгэмд жендэрийн ялгаатай байдал үүсгэх нөхцөлийг үүсгэж байгаа.
Бага насны хүүхдүүдийн сургуулийн хамрагдалтыг авч үзвэл эрэгтэй хүүхдүүд бага. Эрэгтэй хүүхдийн хоол тэжээлийн үзүүлэлт доогуур, эндэгдэл их байна. Тэгэхээр бүх насны эрэгтэй хүүхдэд анхаарал хандуулах ёстой зүйлүүд ажиглагдсан" гэв.
Гэрэл зургууд:
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
