Эмэгтэй шатарчид хоёр дахь ялалтаа байгуулав

Хоёр жил тутамд болдог шатрын олимпиад Унгарын Будапешт хотод энэ сар сарын 10-нд эхэлсэн билээ.

Эхний тойрогт манай эрчүүд Маврикийн багийг 4:0-ээр хожсон бол өнөөдөр Чехтэй 2:2-оор тэнцжээ. Манай улсаас С.Чингүүн өрсөлдөгчөө хожсон бол Г.Амартүвшин өрсөлдөгчөө дийлсэнгүй. 

Мөн Э.Амилал, Э.Баасансүрэн нарын тоглолт тэнцээгээр өндөрлөсөн юм.

Одоогоор гурван оноотойгоор эрэгтэй баг 40-48 дугаар байрт бичигдэж байна. Өнөөдөр Израилийн багтай ухаанаа уралдуулна.

Тэмцээний эхний тойрогт Гватемалын хүүхнүүдийг 4:0-ээр буулган авсан эмэгтэй шатарчид Монакогийн багтай хоёрын даваанд учраа таарсан. Манай тамирчдаас эмэгтэй их мастер Т.Мөнхзул украин гаралтай эмэгтэй их мастер Татьяна Дорнбушд хожигджээ. 

Харин эмэгтэй их мастер Д.Номин-Эрдэнэ, мастер Э.Хүслэн, Б.Мөнгөнзул нар учраагаа ялснаар Монголын баг 3:1-ээр илүүрхэв. 

Эмэгтэйчүүд нийлбэр дүнгээр 20-29 дугаар байрт жагсаж буй. Тэд өнөөдөр Перугийн багтай хүч сорих хуваарьтай.