Малайз улс арван жилийн өмнө сураггүй алга болсон MH370 онгоцны эрлийн ажлыг сэргээхээр болжээ

Арван жилийн өмнө 239 хүнтэй сураггүй алга болсон MH370 нислэгийн дугаартай зорчигч тээврийн онгоцны эрлийн ажиллагааг сэргээх төлөвлөгөөг Малайзын засгийн газар дэмжжээ.

2014 оны гуравдугаар сарын 8-нд Malaysia Airlines компанийн онгоц радараас алга болоод одоо болтол олдохгүй байгаа нь дэлхийн агаарын тээврийн түүхэнд тохиолдсон хамгийн том нууцуудын нэг болсон юм.

Малайзын болон олон улсын мэргэжилтнүүд хэдэн жилийн турш онгоцны ул мөрийг хайгаад юу ч олоогүй.

“Ocean Infinity” гүний хайгуулын компани Энэтхэгийн далайн өмнөд хэсгийн 15,000 хавтгай дөрвөлжин километр талбайд эрлийн ажиллагаа явуулах “зөвхөн олдсон тохиолдолд төлбөр авах” санал тавьсныг Малайзын засгийн газар хэлэлцээд зөвшөөрсөн байна.

“Шинжээчид, судлаачдын хамгийн сүүлд гаргасан мэдээлэл дээр үндэслэн Ocean Infinity шинэ хайлтын бүсийг тогтоосон байна. Тус компанийн санал үнэмшилтэй байгаа тул Малайзын засгийн газар цааш үргэлжлүүлэн ажиллах болно” гэж тус улсын зам тээврийн сайд Энтони Лок Сю Фук өчигдөр мэдэгджээ.

Ocean Infinity өмнө нь 2018 онд Энэтхэгийн далайн 112,000 км.кв талбайд гурван сарын турш хайгаад ямар нэг үр дүнд хүрээгүй юм.

Австрали, Хятад, Малайз улсуудын хамтарсан хайгуулын ажиллагаа Энэтхэгийн далайн 120,000 км.кв талбайд гурван жил орчим хугацаанд үргэлжлээд 2017 онд зогсож байв.

Үүнд нийтдээ 200 сая австрали доллар ($124.8 сая) зарцуулж байжээ.

Малайзын засгийн газар Ocean Infinity компанитай байгуулах гэрээний нөхцөлөө ирэх оны эхээр тохиролцож дуусахаар төлөвлөсөн байна.

Хэрвээ онгоцны ул мөр олдвол Малайзын засгийн газар тус компанид $70 саяыг төлөхөөр тохиролцож байгаа гэнэ.

MH370 нислэгийн дугаартай онгоц Куала-Лумпураас Бээжингийн чиглэлд хөөрснөөсөө хойш нэг цагийн дараа радараас гарч, сураггүй алга болсон юм.

Онгоцонд 227 зорчигч, нисэх багийн 12 ажилтан явж байжээ.

Зорчигчдын ихэнх нь Хятадын иргэд, үлдсэн нь Малайз, Австрали, Канад, Франц, Энэтхэг, Индонез, Шинэ Зеланд, Украин, Нидерланд, АНУ-ын иргэд байсан юм.

Шинжээчид Boeing 777 онгоц сураггүй алга болохоос өмнө байршил тогтоогч транспондерыг хэн нэг нь гараар унтраасан байж болзошгүй гэж үздэг.

Их Британийн Inmarsat хиймэл дагуулын компани онгоцноос ирсэн радио дохион дээр үндэслэн Австралийн баруун эргийн Перт хотоос баруун зүгт 2,000 км зайтай оршдог Энэтхэгийн далайн алслагдсан хэсэгт унасан гэх дүгнэлтийг 2014 онд гаргаж байжээ.

Эх сурвалж: Reuters