Ерөнхий сайдын "БЭЛЭГ"

Гэрэл зургийг MPA агентлагийн онцгой зөвшөөрөлтэйгөөр ашиглав

Гадаадад айлчилж байна гэхээс өөрөөр ойрын хугацаанд олон нийтэд бараа нь харагдаагүй Ерөнхий сайд Л.Оюун-Эрдэнэ өнөөдөр мэдээлэл хийж, шинэ жилийн "бэлэг"-ээ барив.

Бэлгийн багцад иргэдийн нэрийн дансанд хуримтлагдаж буй мөнгө, "Эрдэнэс Тавантолгой" ХК-ийн ногдол ашиг багтлаа.

Тодруулбал Хуримтлалын санд нийт 495 тэрбум төгрөг байгааг Монгол Улсын нийт иргэний тоонд хувааж үзвэл хүн бүр 135,000 төгрөгийн хадгаламжтай болжээ. Энэ мөнгө цаашид ч өсөн нэмэгдэнэ. Гэхдээ бэлнээр зарцуулагдахгүй бөгөөд эрүүл мэнд, орон сууц, боловсролдоо бэлэн бусаар зарцуулж болох юм.

Удаах бэлэг нь "Эрдэнэс Тавантолгой" ХК-ийн ногдол буюу иргэдийн нэрлэж заншсанаар 1,072 хувьцааны мөнгө. Тус компани энэ онд 4.3 их наяд төгрөгийн ашигтай ажилласнаар 1,072 хувьцаа эзэмшигч иргэд дунджаар 350,000 төгрөг авах боломж бүрдсэн байна. Ногдол ашгийг өмнө нь хавар олгодог байсан бол ирэх жилээс өвлийн улиралд гурав хуваан иргэдийн дансанд шилжүүлэхээр төлөвлөв. Иргэн бүрд 350,000 төгрөгийг нэг дор олгох нь инфляц өдөөх эрсдэлтэй тул ингэж шийдвэрлэжээ.

Одоогоор 2023 оны арванхоёрдугаар сарын 31-н ба түүнээс өмнө төрсөн Монгол Улсын 3.4 сая иргэн хувьцааг эзэмшиж буй.

Түүнчлэн Засгийн газрын 100 хоногтой зэрэгцэн танилцуулагдсан зарим шийдвэрийг онцолъё.

Бадрах энержи төслийн хөрөнгө оруулалтын гэрээг ирэх долоо хоногийн Лхагва гарагт УИХ-д өргөн барихаар тогтож байна. Энэ бол Оюутолгойн төслөөс хойших гуравдагч хөршийн хоёр дахь том гэрээ юм.

Засгийн газрын эзэмших 34 хувийн 10 хувь нь алтан хувьцаа байхаар тогтжээ. Ингэснээр Монголын тал ямар нэгэн хариуцлага хүлээхгүй юм.

"24 хувь нь Хуримтлалын санд иргэдийн хадгаламж хэлбэрээр очиход АМНАТ нь орох байдлаар тооцох аргачлал руу орж байгаа. Энэ хэлэлцэл хийгдэж чадвал цаашдаа маш олон төслийн хэлцэл хийгдэнэ. 34 хувь болон АМНАТ тооцох асуудал иргэдийн e-Mongolia дахь хуримтлал руу төвлөрөх учраас иргэн бүхэн том төслүүдээ дэмждэг байх нийгмийн уур амьсгал үүснэ" гэж Ерөнхий сайд тодотгосон.

Түүнчлэн ирэх долоо хоногийн Лхагва гарагт Гашуунсухайт-Ганц мод хил холболтын төмөр замын Засгийн газар хоорондын хэлэлцээрийг УИХ-д өргөн барих юм. 16 жил гацсан энэхүү асуудал нь шийдэгдсэнээр экспорт нэмэгдэхэд түлхэц болно гэж үзэж буй.

Ийнхүү олны нүднээс далд байсан Ерөнхий сайд Засгийн газрын 100 хоногийг тохиолдуулан "баатар"-ын дүртэйгээр гарч ирэв.

Засгийн газрын ээлжит бус хуралдаанаас гарсан шийдвэрийн тухай мэдээлэл: