Нийслэлийн утаа, түгжрэл гамшгийн түвшинд хүрснийг ЗГ хүлээн зөвшөөрч, Өндөржүүлсэн бэлэн байдлын зэрэгт шилжүүлэв

Гэрэл зургийг MPA агентлагийн онцгой зөвшөөрөлтэйгөөр ашиглав

Засгийн газрын ээлжит бус хуралдаанаар өнөөдөр Улаанбаатар хотын агаарын бохирдлын талаар хэлэлцэж, өндөржүүлсэн бэлэн байдлын зэрэгт шилжүүлжээ. 

Түүнчлэн агаар, хөрсний бохирдлыг бууруулах асуудлаар гаргасан шийдвэрээ Ерөнхий сайд танилцууллаа.

Ерөнхий сайд Л.Оюун-Эрдэнэ "Нийслэл Улаанбаатар хотын түгжрэл, агаар, хөрсний бохирдол бол олон шалтгаант үр дагаврын бидэнд харагдаж шинж тэмдэг. Эрчим хүчний дутагдал, газрын наймаа, төлөвлөлтгүй гэх зэрэг олон асуудал бий.

Засгийн газрын баримталж буй байр суурь бол нийслэлийн асуудлыг Нийслэл өөрөө шийдэх санхүүгийн чадвартай байх ёстой. Хотын асуудлыг хотын удирдлагаас давж шийдэх боломжгүй.

Улаанбаатар хотын түгжрэл, эрчим хүчний дутагдал, агаар, хөрсний бохирдол гамшгийн түвшинд хүрснийг бүх нийтээр хүлээн зөвшөөрөх ёстой. Тиймээс ч өнөөдрөөс эхлэн Өндөржүүлсэн бэлэн байдлын зэрэг шилжүүлж байна.

Тулгамдаж буй эдгээр асуудлыг шийдвэрлэхийн тулд хууль эрх зүйн орчныг шинэчлэх хэрэгтэй гэж үзэн ирэх долоо хоногт УИХ-д нээлттэй танилцуулж, дэмжлэг авна.

Нийслэлийн асуудлыг 50 гаруй хуулиар зохицуулдаг. Гэхдээ агаарын бохирдол, түгжрэлийг гамшиг гэж үзэн шийдэх ёстой. Тусгай хууль эрх зүйн орчин шаардлагатай бөгөөд энэ талаар яаралтай горимоор хэлэлцүүлэхээр өргөн барина.

Агаарын бохирдлыг бууруулахыг бүх нийтийн үйлс болгохыг дэмжих зорилгоор нэг хувийн татварын эрх зүйн орчин бүрдсэнийг та бүхэн мэдэж байгаа. Аж ахуйн нэгж борлуулалтын орлогын албан татварынхаа нэг хувийг Засгийн газрын зорилго, нийгэмд тустай зүйлд дэмжлэг үзүүлэхэд зориулбал тэр нэг хувийн татварыг нь авахгүй үлдээхээр болсон.

Бидний тооцож буйгаар аж ахуйн нэгжүүд хүсвэл нэг их наяд орчим төгрөгийн татвараа авч үлдэх боломжтой. 2024 оны IV улирал болон 2025 оны татварын хөнгөлөлтийг бүхэлд нь нийслэлийн агаар, хөрсний бохирдлыг бууруулахад зарцуулахаар шийдвэрлэлээ. 2026 оноос цаашлаад боловсрол, соёл зэрэг бусад асуудлыг нээгээд явах нь зүйтэй" гэв.

Өндөржүүлсэн бэлэн байдлын зэрэг нь өнөөдрөөс эхлээд 2025 оны гуравдугаар сарын 1-нийг хүртэл үргэлжилнэ.

Энэ хугацаанд Агаарын тухай хууль, Нийгмийн эрүүл мэндийн тусламж үйлчилгээний тухай хууль, Гамшгаас хамгаалах тухай хууль болон холбогдох бусад хууль тогтоомжид заасан арга хэмжээг хэрэгжүүлж ажиллахыг Засгийн газрын гишүүд, агентлагийн дарга нар, нийслэлийн бүх шатны Засаг дарга, аж ахуйн нэгж, байгууллагын удирдлагад үүрэг болголоо.

Мөн Агаарын тухай хуульд заасны дагуу аймаг, нийслэлийн агаарын чанарыг сайжруулах бүсийг шинэчлэн тогтоож, агаарын бохирдлыг бууруулах чиглэлээр богино, дунд, урт хугацааны хөтөлбөр, төлөвлөгөө боловсруулан баталж, хэрэгжүүлж хангаж ажиллахыг Орчны бохирдлыг бууруулах Үндэсний хорооны дарга, Байгаль орчин, уур амьсгалын өөрчлөлтийн сайд С.Одонтуяа, аймаг, нийслэлийн Засаг дарга нарт даалгав.

ВИДЕО: