Х.Буянжаргал: Ажиллах хүчний шилжилт хөдөлгөөний тухай хуульд өөрчлөлт оруулахыг МҮЭХ дэмжихгүй

Гэрэл зургийг MPA агентлагийн онцгой зөвшөөрөлтэйгөөр ашиглав

Гэр бүл, Хөдөлмөр, Нийгмийн хамгааллын Яамны сайд Л.Энх-Амгалан өнөөдөр "Ажиллах хүчний шилжилт хөдөлгөөний тухай хуульд нэмэлт, өөрчлөлт оруулах тухай хуулийн төсөл" өргөн барьснаа танилцуулсан.

Тэгвэл энэ хуулийн төслийг эсэргүүцэж байгаагаа Монголын Үйлдвэрчний Эвлэлийн Холбоо (МҮЭХ)-ноос мэдээлэл хийлээ.

Энэ талаар тус холбооны Ерөнхий нарийн бичгийн дарга Х.Буянжаргал "Хуулийн нэмэлт өөрчлөлт нь уул уурхай, газрын тосны олборлох үйл ажиллагаанаас бусад эдийн засгийн үйл ажиллагааны салбарт гурав хүртэлх жилийн хугацаанд Монгол Улсад хөдөлмөр эрхлэх гадаад ажилчдын тоо, хувь хэмжээг тогтоохгүй байх, дээрх хугацаанд гадаад ажилчдын ажлын байрны төлбөрөөс чөлөөлөгдөх заалт бүхий хуулийг өргөн барилаа.

Тиймээс МҮЭХ-ноос байр суурь илэрхийлж, албан ёсны мэдэгдэл гаргаж байна.

Монгол Улсын Засгийн газар нь 2024-2028 онд хэрэгжүүлэх 14 мега төслийн хүрээнд 280,000 ажлын байр бий болох тооцооллыг гаргасан. Харин барилга, зам боловсруулах үйлдвэр зэрэг улирлын шинж чанартай бүтээн байгуулалтын ажил дээр гаднын ажиллах хүчний төлбөрөөс хөнгөлөх, чөлөөлөх асуудлаар сайд Л.Энх-Амгалан мэдэгдсэн.

Өнөөдрийн байдлаар манай улсад хөдөлмөр эрхэлж буй гадаад ажилчдын тоо 17,831-д хүрсэн. Үүнээс БНХАУ-ын 12,364 иргэн байгаа бол Вьетнам улсаас 768, Туркээс 415 гэх зэрэг олон улсаас ирж ажилладаг.

Эдгээр гаднын ажилчдыг насны ангиллаар нь авч үзвэл 35-55 насны иргэд дийлэнх нь байна.

Гэвч манай статистикийн хорооноос гаргасан тоон баримтаас харахад хөдөлмөр эрхлэх боломжтой 1,448,369 иргэн байгаагаас 20-40 насны 70,000 иргэн ажилгүй байна.

Иймд өнөөдөр өргөн барьсан хуулийн нэмэлт өөрчлөлт батлагдвал манай улсад тодорхой асуудал үүсэж болзошгүй.

Тодруулбал үндэсний аюулгүй байдал, үндэсний ажиллах хүчний ажлын байрыг гаднынхан булаах тооцоолол харагдаж байна. Энэ бол ажил олгогчдыг шууд дэмжсэн хууль.

Хүн амзүйд ч нөлөөлж магадгүй. Олон жил суурьшсан Вьетнам иргэдийн асуудал өнөөдөр ч хүчтэй яригдаж байгаа.

Мөн бараа бүтээгдэхүүний үнэ өснө. Бараа бүтээгдэхүүний хомсдол бий болно. Цалин хэлбэрээр мөнгө гадагшаа урсах гэх мэт болзошгүй сөрөг хүчин зүйлүүд байгааг анхаарах хэрэгтэй. 

Эдгээрийг зохих ёсоор зөвлөлдөж байж шийдэх ёстой байсан ч тийм зүйл болоогүй. Тиймээс манай холбооноос дэмжихгүй гэдгээ илэрхийлж байна" гэж ярилаа.