СУДАЛГАА: Сүүлийн үед гэр бүл, найз нөхөд, байгууллагаар аялахаас илүү ГАНЦААРАА АЯЛАХ сонирхол давамгайлж байна
"Дотоодын аялал жуулчлалын 2024 оны чиг хандлага, таамаглал" сэдэвт судалгааны үр дүнг танилцуулах хэвлэлийн бага хурал өнөөдөр зохион байгуулагдлаа.
Энэ үеэр Монголын аялал жуулчлалын судалгаа, зарим таамаглалын талаарх мэдээллийг “Улаанбаатар аялал жуулчлалын холбоо” НҮТББ-ын судлаач Б.Ербахыт танилцуулав.
Сүүлийн үед аялагчид гэр бүл, найз нөхөд, байгууллагынхантайгаа аялахаас илүү ГАНЦААРАА АЯЛАХ сонирхол давамгайлж байгаа онцлох үр дүн судалгаанаас ажиглагдсаныг тэрбээр ярьсан юм.
Энэ талаар "Улаанбаатарын аялал жуулчлалын холбооноос аялагчдад зөвлөгөө, мэдээлэл өгөх чиглэлд сүүлийн 10 гаруй жилийн хугацаанд ажиллаж байна.
Улмаар дотоодын аялагчдаас судалгаа авах ажлыг гурав дахь жилдээ зохион байгуулж буй.
Өнгөрсөн жил наадмын дараах амралтаар Улаанбаатар хотоос 860,000-883,000 дотоодын аялагч гарах магадлалтай гэх таамаглал, тооцоог гаргаж байсан. Үүний дараа төлбөр авах цэгүүдээр нэвтэрсэн авто машины тоогоор батлахыг оролдсон.
2023 оны арван сарын байдлаар улсын хэмжээнд 1,493,000 хүн аялсан талаарх тооцоо судалгаа байгаа. Судалгааны үргэлжлэл энэ жил дахиад хийгдсэнийг танилцуулъя.
Монгол орны аль бүсэд хэчнээн тооны жуулчид аялахыг тооцоолон гаргахыг зорьж байна.
Судалгааны аргачлал хоёр шатаар явагдана. Эхлээд таамаг тооцоо гаргаж, наадмын дараа үндсэн үр дүн буюу нийт хэчнээн жуулчин аялснаа зарлана" гэдгийг судлаач Б.Ербахыт мэдээллийн эхэнд хэлэв.
"Ганцаараа эсвэл танихгүй групптэй хамт аялах сонирхол давамгайлж байна"
Мөн тэрбээр "Хамт аялах хүмүүсийг төрлөөр нь авч үзсэн.
Дотоодын аялал жуулчлал анх эрчимжиж байх үедээ гэр бүл эсвэл найз нөхдийн аялал гэсэн хоёрхон хэлбэртэй байсан. Сүүлийн жилүүдэд гэр бүл, найз нөхөд, байгууллагаар аялах дотоодын жуулчдын тоо буурч байна.
Харин эсрэгээрээ ганцаараа аялах хүмүүсийн тоо нэмэгдэх хандлагатай болжээ. Мөн танихгүй групптэй аялах сонирхолтой хэсэг нийт аялагчдын таван хувийг эзэлж байсан.
Үүний зэрэгцээ мэргэжлийн байгууллага эсвэл аяллын клубээр дамжуулж аялах хүсэл сонирхолтой бүлгүүд нэмэгдэж байна" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
