Тайчигчийн түүхийг өгүүлсэн инээдмийн кино Каннын наадмын дээд шагналыг хүртэв

Нью-Йорк хотын тайчигч эмэгтэйн түүхийг өгүүлсэн “Anora” инээдмийн кино өчигдөр Каннын Кино Наадмын дээд шагнал болох “Palme d’Or”-ийг хүртжээ.

Тус киноны найруулагч Шон Бэйкерийг энэ шагнал Америкийн инди төрлийн киноны тэргүүлэх уран бүтээлчдийн нэг болсныг баталсан бол гол дүрийн 25 настай жүжигчин Майки Мэдисоныг олны танил болгосон байна.

Оросын олигархи эцэг эхийнхээ эсэргүүцлийг үл хайхран тайчигч болсноор баян үйлчлүүлэгчээсээ их хэмжээний эд хөрөнгө салгаж чадсан эмэгтэйн дүрийг Мэдисон бүтээжээ.

Шүүгчдийн тэргүүн, “Barbie” киноны найруулагч Грета Гервиг уг киног “бидний зүрх сэтгэлийг булаасан гайхалтай хүмүүнлэг бүтээл” гэж магтсан байна.

Найруулагч Бэйкер уг бүтээлээ бүх биеэ үнэлэгчдэд зориулсныг зарлажээ.

“Миний амьдралын сүүлийн 30 жилийн цорын ганц зорилго энэ кино байсан тул үлдсэн амьдралдаа юу хийхээ үнэхээр мэдэхгүй байна” гэж тэр ярьсан байна.

 

`Anora` киноны жүжигчид, Голд нь Майки Мэдисон

77 дахь удаагаа Францын өмнөд эрэгт зохион байгуулагдсан энэ жилийн наадамд фэминист болон улс төрийн агуулгатай бүтээлүүд түлхүү өрсөлдсөн юм.

Уг наадмын түүхэнд анх удаа транс эмэгтэй шилдэг эмэгтэй дүрийн шагнал хүртсэнээс үүнийг харж болно. Жүжигчин Карла Софиа Гаскон энэ шагналыг “Emilia Perez” кинонд бүтээсэн Мексикийн хар тамхины мафийн хүйсээ солиулсан боссын дүрээр авсан байна.

Каннын кино наадмын дэд байрын шагнал Grand Prix-ийг 30 жилийн дараа анх удаа Энэтхэгээс оролцсон “All We Imagine as Light” кино хүртжээ. Уг бүтээлд асрагчийн ажил хийхээр Мумбай хотод нүүж ирсэн хоёр эмэгтэйн сэтгэл хөдөлгөм түүхийг өгүүлдэг байна.

Наадмын гуравдугаар байр болох Шүүгчдийн Шагналыг дээр дурдсан “Emilia Perez” хүртсэн юм. Уг киног Францын Жак Аудиар найруулжээ.

Шилдэг найруулагчийн шагналыг Португалийн Мигуэл Гомез “Grand Tour” киногоороо хүртсэн байна. Уг кинонд сүйт бүсгүйгээ хаяж, Ази тивээр аялж буй эрийн түүхийг өгүүлдэг юм.

Шилдэг Зохиолын шагналыг нас ахисан эмэгтэйчүүд бие махбодоо төгс байлгахын тулд ямар зовлон туулдгийг харуулсан аймшгийн сэдэвтэй “The Substance” кино хүртжээ. Уг киноны гол дүрд Холливүүдийн жүжигчин Дэми Мүүр тогложээ.

“Star Wars” киноны найруулагч Жорж Лукас энэ жилийн хүндэтгэлийн “Palm d’Or” шагналыг найз Фрэнсис Форд Копполагийн гараас хүлээж авсан байна.

Коппола энэ жил үзэгчдийг нэлээд талцуулж, шуугиулж буй “Megalopolis” киногоороо Каннын наадамд оролцсон юм.

Эх сурвалж: AFP