Украины нэрт боксчин Василий Ломаченко зодог тайллаа

Олимпын хошой аварга (2008, 2012), мэргэжлийн боксын дэлхийн аварга асан Украины Василий Ломаченко 37 насандаа их спортоо орхиж буйгаа мэдэгдлээ.

Сонирхогчдын боксын замналдаа 396 тулаан хийж, ганц удаа хожигдсон үзүүлэлттэйгээр Ломаченко 2013 онд мэргэжлийн боксод орсон юм. Ердөө 12 тулаан хийхдээ гурван өөр жинд аваргын бүс эзэмшиж байсан украин эр 21 тулааны эцэст боксын бээлийгээ хананд өлгөх шийдвэр гаргажээ.

Тэрбээр сонирхогчдын боксын ангилалд Дэлхийн Аварга Шалгаруулах Тэмцээн (ДАШТ)-ээс хошой алт (2009, 2011), нэг мөнгөн (2007) медаль хүртэж байв.  

Замналдаа ганц удаа хожигдохдоо 2007 оны ДАШТ-ий шигшээд ОХУ-ын Альберт Селимовт дийлдсэн удаатай.

Харин мэргэжлийн замналдаа 21 тулаан хийж, 18 ялсан. Хамгийн сүүлд өнгөрсөн оны тавдугаар сарын 12-ны өдөр Австралийн Жорж Камбососыг арваннэгдүгээр үед хүнд цохилтоор ялж, IBF холбооны аваргын бүс эзэмшиж эхэлсэн юм.

Гэвч замналаа үргэлжлүүлэхгүй гэх шийдвэрээ өөрийн цахим хуудсаараа дамжуулан олон нийтэд мэдээлжээ.

Эх сурвалж: Ring Magazine