Нутаг дэвсгэр дээр нь аллага үйлдсэн хэрэгт Канадын ерөнхий сайд Энэтхэгийн эрх баригчдыг буруутгав
Нутаг дэвсгэр дээр нь сикх үндэстнүүдийн удирдагч Хардип Сингх Нижжарын амийг хөнөөхөд Энэтхэгийн эрх баригчид оролцсоныг батлах хангалттай нотолгоо байгааг Канадын ерөнхий сайд Жастин Трюдо өчигдөр мэдэгджээ.
Энэ мэдэгдэл хоёр улсын харилцааг улам муутгах нь тодорхой юм.
Өчигдөр Канадын парламентын нийтийн танхимд Трюдо уг хэргийн мөрдлөгийн явцыг танилцуулахдаа ингэж мэдэгджээ.
Тэрбээр саяхан Дели хотод болж өнгөрсөн Их 20-ын уулзалтын үеэр Энэтхэгийн ерөнхий сайд Нарендра Модитой уулзахдаа уг асуудлыг хөндөж байлаа. Уулзалт нэлээд ширүүн уур амьсгалтай болж, Моди “Канад дахь Энэтхэгийн эсрэг үзэл, экстремист элементүүдэд маш их санаа зовж байгаагаа” Трюдод илэрхийлснийг Делигийн албаны эх сурвалж тухайн үед мэдээлж байв.
“Канадын нутаг дэвсгэр дээр Канадын иргэний амийг хөнөөхөд гадаадын засгийн газар ямар нэг байдлаар оролцсон нь манай бүрэн эрхэт байдалд халдсан ноцтой үйлдэл. Канад бол хууль дүрмийг дээдэлдэг улс бөгөөд тусгаар тогтнол, иргэдээ хамгаалах нь манай үндсэн үүрэг юм” гэж Трюдо хэлжээ.
Тэрбээр цааш нь хэлэхдээ “Манай хууль сахиулах болон аюулаас хамгаалах байгууллагууд бүх канадчуудын аюулгүй байдлыг хангах нь бидний нэн тэргүүний зорилт. Хоёрдугаарт, бид энэ аллагад буруутай этгээдүүдэд хариуцлага тооцох бүх арга хэмжээг авах болно” гэж мэдэгдсэн байна.
Энэ оны зургаадугаар сард Бритиш Колумбиа мужийн Суррей хот дахь сикхүүдийн сүмийн гадаа Нижжар буудуулж алагдсан юм.
Тэрбээр Энэтхэгийн Пунжаб мужид амьдардаг сикхүүдийг тусгаар тогтнуулах зорилготой Халистан хөдөлгөөний идэвхтэн байв.
Үүнээс өмнө Нижжарыг Пунжаб мужид хиндү шашны санваартны амь насанд халдсан хэргийг зохион байгуулагчдын нэг гэж Энэтхэгийн засгийн газар үзэж, түүнийг баривчлахад шаардлагатай мэдээлэл өгсөн хүнийг $12,000-аар шагнахаа амлаж байжээ.
Тиймээс Нижжарын аллагад Делигийн эрх баригчид оролцсон гэж олон хүн сэжиглэж байлаа.
Канадын гадаад хэргийн сайд Мелани Жоли ойрын үед Энэтхэгийн дипломатчидыг нутаг дэвсгэрээсээ албадан гаргахаар төлөвлөж буй тухай мэдэгджээ.
Нижжарын аллагатай холбоотой маргааны улмаас Канад, Энэтхэг улсууд худалдааны гэрээ байгуулах яриа хэлэлцээгээ зогсоосон юм.
Эх сурвалж: The Guardian
