Б.Лхагвасүрэн: 2021 онд Хөгжлийн Банканд хийсэн шалгалтаар 1.7 их наяд төгрөгийн зээл эргэн төлөгдөх боломжгүй гэсэн дүгнэлт гарсан
Хөгжлийн Банкны хянан шалгах түр хорооноос зохион байгуулж буй нотлох баримтыг шинжлэн судлах хоёр дахь шатны сонсгол өнөөдөр эхэллээ.
Энэ үеэр Монголбанкны ерөнхийлөгч Б.Лхагвасүрэн сонсголд гэрчээр дуудагдаж, түр хорооны гишүүдийн асуултад хариуллаа.
"Би 2011-2013 онд Хөгжлийн Банкны ТУЗ-д ажиллаж байсан. Хэдийгээр Хөгжлийн Банкны хуульд нэмэлт өөрчлөлт орсон хэдий ч Монголбанктай холбоотой гурав, дөрөвхөн заалт нэмэгдсэн. Одоо мөрдөгдөж байгаа хуульд Монголбанк ороод хяналт шалгалт хийгээд ажиллахад хязгаарлагдмал тогтолцоотой явж байгаа.
2019 онд Засгийн газартай, 2020 онд Сангийн яамтай хамтраад хийсэн шалгалтууд байгаа. Ялангуяа тухайн үед хийсэн шалгалтаар тавьсан акт материалыг хуулиар заагдаагүй зүйл байна хэмээн нийслэл дэх захиргааны хэргийн анхан шатны шүүхэд гомдол гаргасан. 2018 онд Монголбанкны хийсэн акт тогтоолуудыг нийслэлийн анхан шатны шүүх түдгэлзүүлж байсан. Дараа нь давж заалдах шатны шүүх гээд нийт таван удаа шүүхдэлцээд нийслэлийн давж заалдах шүүх 2019 оны гуравдугаар сарын 28-ны өдөр Монголбанкны шалгалтын актыг түдгэлзүүлэх шийдвэр гарч байсан.
Өнөөдрийн зохицуулж байгаа хууль эрх зүйн хүрээнд Монголбанк нь Сангийн яам, Засгийн газарт шалгалт хийх хүсэлт тавих, эсвэл хамтарч шалгалт хийх маягаар явж байна. Хууль эрх зүйн хүрээнд Монголбанк улсын байцаагчийнхаа актыг тавиад орхидог. Үүний биелэлтийг дараагийн шалгалтаар аваад явдаг.
Хамгийн сүүлд буюу 2021 онд хийсэн шалгалтын актаар 1.7 их наяд төгрөгийн зээл чанаргүй болж, эргэн төлөгдөх боломжгүй эрсдэлтэй байна гэсэн дүгнэлт Монголбанкны хэсэгчилсэн шалгалтаар илэрсэн байгаа" хэмээн ярилаа.
ВИДЕО
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
9 СЭТГЭГДЭЛТЭЙ
|
