Хятадын агаарын бөмбөлгийг АНУ буудаж унагалаа
АНУ-ын нутаг дээгүүр нисэж байсан тагнуулын зориулалттай байж болзошгүй агаарын бөмбөлгийг Бямба гарагт Атлантын далайн усан дээр байхад нь буудаж унагаснаа Пентагон мэдээлжээ.
Байлдааны сөнөөгч онгоц бөмбөлгийг буудаж унагах үеэр Умард болон Өмнөд Каролина мужуудын эрэг, агаарын орон зайг хааж, нисэх онгоцны гурван буудлын ажиллагааг түр зогсоосон байна.
Бага хэмжээний дэлбэрэлтийн дараа бөмбөлөг далайд унаж буйг Америкийн хэвлэлүүдийн тараасан дүрс бичлэг харуулжээ.
Агаарын бөмбөлгийг орон нутгийн цагаар 14:39 цагт АНУ-ын эргээс 11 км зайд байхад нь F-22 сөнөөгч онгоцноос AIM-9X пуужингаар нэг удаа буудаж унагасныг албаны эх сурвалж мэдээлсэн байна.
Бөмбөлөг өнгөрсөн долоо хоногийн Лхагва гарагт Канадаас Монтана мужийн нутаг дэвсгэрт анх нэвтэрсэн юм. Хятадын тал үүнийг хүчтэй салхины улмаас жолоодлогоо алдсан цаг агаарын судалгааны станц гэж тайлбарлаж байв.
Гэсэн хэдий ч АНУ-ын улс төрчид, олон нийтийн зарим хэсэг бөмбөлгийг буудаж унагахыг ерөнхийлөгч Байдены засаг захиргаанаас шаардаж байлаа.
Уг үйл явдалтай холбоотойгоор АНУ-Хятадын дипломат харилцаанд хямрал бий болж, төрийн нарийн бичгийн дарга Энтони Блинкен ирэх долоо хоногт Бээжинд хийх байсан айлчлалаа хойшлуулсан юм.
Ерөнхийлөгч Жо Байден бөмбөлгийг буудаж унагаахыг Лхагва гарагт зөвшөөрч байжээ. Харин Пентагон үүнийг хүн амын суурьшлын бүсээс холдох хүртэл хүлээх шийдвэр гаргасан юм байна.
Одоо АНУ-ын зэвсэгт хүчин бөмбөлгийн үлдэгдлийг Атлантын далайн мандлаас цуглуулж байгаагаа ажээ.
Хоёр тэнгисийн хөлөг бөмбөлөг унасан хэсэгт ажиллаж байгаа гэнэ. Тэдний нэг нь хүнд даацын өргөгч крантай юм байна.
Хятадын тал агаарын бөмбөлөг тагнуулын зориулалтгүй байсныг баталж, асуудлыг хэт дэвэргэхгүй байхыг АНУ-ын талд уриалж байв.
Төрийн нарийн бичгийн дарга Блинкен энэ сарын 5-6-ны өдрүүдэд Хятадад айлчилж, олон асуудлаар хэлэлцээ хийх төлөвлөгөөтэй байжээ. Тэрбээр цар тахал эхэлсэн цагаас хойш Хятадад айлчилсан АНУ-ын анхны өндөр албан тушаалтан болох юм.
Баасан гарагийн орой Хятадын хоёр дахь агаарын бөмбөлөг Латин Америкийн Коста-Рика, Венесуэл улсуудын агаарын орон зайд үзэгдсэн тухай Пентагон мэдээлж байв. Гэхдээ Хятадын талаас хоёр дахь бөмбөлгийн талаар ямар нэг тайлбар өгөөгүй байна.
Эх сурвалж: BBC
