Өвлийн усанд сэлэлтийн дэлхийн аварга болсон 10 настай охин өвөөгийн хамтаар эх орондоо ирнэ

Словени, Франц улсад болсон мөстэй, өвлийн усанд сэлэлтийн Дэлхийн Аварга Шалгаруулах Тэмцээнд/ДАШТ/ Монгол Улсаас оролцсон өвөө, зээ охин хоёр 9 медалийн эзэн болжээ. Тэд хоёрдугаар сарын 2-ны Пүрэв гарагт эх орондоо ирэх юм байна.

Тодруулбал, Словени улсын Блед хотод 2023 оны нэгдүгээр сарын 23-27-нд болсон өвлийн усанд сэлэлтийн ДАШТ-ээс 50, 25 метрийн мэлхий сэлэлтийн төрөлд Баянгол дүүргийн усанд спорт сургалтын төвийн тамирчин 10 настай, М.Цэнгүүн хос алт, мөнгөн медаль хүртжээ. Энэ нь манай улсын түүхэнд өвлийн усанд сэлэлтийн анхны дэлхийн аварга юм байна.

М.Цэнгүүний өвөө Монголын өвлийн усанд сэлэлтийн холбооны тэргүүн, Онцгой байдлын аврагч Ш.Даваадорж уг тэмцээнд хоёр мөнгө, гурван хүрэл медалийн амжилт үзүүлэв.

Словени улсад болсон өвлийн усанд сэлэлтийн тэмцээнд 42 улсын 1,200 тамирчин оролцжээ.

Түүнчлэн нэгдүгээр сарын 28-нд Франц улсад болсон мөстэй усанд сэлэлтийн ДАШТ-ээс Ш.Даваадорж нэг хүрэл медаль хүртсэн бөгөөд 31 улсын тамирчид өрсөлдсөн байна.

Өвлийн усанд сэлэлтийн тэмцээнийг +5, мөстэй усанд сэлэлтийнхийг -2-оос +3 хэмийн усанд зохион байгуулдаг аж.