Бразилын экс ерөнхийлөгч АНУ-д үлдэхийн тулд жуулчны виз авах хүсэлтээ гаргажээ
Сонгуульд ялагдсанаасаа хойш АНУ-д оршин сууж буй Бразилын экс ерөнхийлөгч Жайр Болсонару цаашид үргэлжлүүлэн суухын тулд зургаан сарын хугацаатай жуулчны виз авах хүсэлт гаргасныг өмгөөлөгч нь Даваа гарагт мэдээлжээ.
“Тэр хэсэг хугацаанд амарч, бодлоо цэгцэлж, дараагийн алхмаа шийдэхийн тулд АНУ-д дахин хэдэн сар байх хэрэгтэй байгаа. Визийн зургаан сарын хугацаагаа бүрэн ашиглах эсэх нь түүний шийдвэрээс хамаарна” гэж Болсонаругийн өмгөөлөгч Фелипе Александр өчигдөр сэтгүүлчидтэй уулзахдаа ярьсан байна.
Барууны үзэлтэй ерөнхийлөгч Болсонару залгамжлагч нь тангараг өргөхөөс хоёр өдрийн өмнө АНУ-ын Флорида руу ниссэн юм.
Зүүний үзэлтэй шинэ ерөнхийлөгч Лула да Силваг үүрэгт ажилдаа орсны дараахан Болсонаруг дэмжигчид үймээн дэгдээж, Бразилын парламент, дээд шүүх, ерөнхийлөгчийн байрыг эзлэн бусниулж байв.
Тэд өнгөрсөн оны аравдугаар сард болсон сонгуулийн үр дүнг эсэргүүцэж, цэргийн эргэлт хийхийг уриалж байлаа.
Бразилын дээд шүүх уг үймээний захиалагч нь Болсонару байсан эсэхийг мөрдөн шалгаж эхлээд байгаа.
Энэ сарын эхээр АНУ-ын конгрессын төлөөлөгчдийн танхимд Ардчилсан намаас сонгогдсон 41 гишүүн үймээнийг мөрдөн шалгахад Бразилын эрх баригчидтай хамтран ажиллаж, Болсонаруд олгосон аливаа визийг цуцлахыг ерөнхийлөгч Байдены засаг захиргаанд уриалж байжээ.
Харин төрийн департамент хэн нэг хувь хүний визийн асуудлыг тусгайлан авч хэлэлцэх боломжгүйгээ дахин дахин илэрхийлээд байна.
Гадаадын төрийн тэргүүнүүд, дипломатчидад зориулагдсан “A” ангиллын виз 30 хоногийн хугацаатай байдаг ба хугацааг дуусахаас өмнө АНУ-аас гарч явах, эсвэл өөр төрлийн виз авч, хугацаагаа сунгах ёстой байдгийг төрийн департамент тайлбарласан юм.
Болсонаруг ийм төрлийн визээр АНУ-д ирсэн гэлцэж байна.
Эх сурвалж: Reuters
