750 сая ам.доллароор барих нэгдүгээр тойрог замын урьдчилгаа 15 хувийг "Эрдэнэс Монгол" компани төлөхөөр болжээ
Нийслэл хотод хэрэгжих нэгдүгээр тойрог зам төслийн явцын талаар хотын дарга танилцуулав.
Хотын дарга Х.Нямбаатар "Нэгдүгээр тойрог хурдны замын Техник Эдийн Засгийн Үндэслэлийг/ТЭЗҮ/ боловсруулах ажил 80 гаруй хувьд хүрсэн. Энэ сард шахаж ажиллаж, ирэх сарын эхний долоо хоногуудад АТҮТ, Барилгын хөгжлийн төв, Шинжлэх ухаан, технологийн зөвлөлөөр ТЭЗҮ-ээ батлуулна. Үүний дараа уг замыг барих гурван багц тендер зарлана.
Яармагийн гүүрнээс эхлэх хэсгийг нэгдүгээр, туннельтэй хэсгийг хоёрдугаар, үлдсэнийг гуравдугаар багцад хамруулна.
Тойрог хурдны замын нийт урт 25.7 километр. Үүнээс Баянхошуу хайрхны баруун талын Цамбагарав уулын орчимд хоёр километр гаруй газарт туннель барих юм. Уг замын өндөр газарт туннелиэр, нам газарт гүүрэн байгууламжаар нэг түвшинд зорчино.
Хамгийн их гүүрэн байгууламжтай хэсэг нь Шархадны колонктой уулзвараас Туулын хурдны зам хүртэлх хэсэг. Энэ хэсэгт газар чөлөөлөлтийн орон зайгүй учраас гүүр олон баригдана.
Нэгдүгээр тойрог хурдны замыг 28 сарын хугацаанд барьж дуусгахаар төлөвлөсөн.
Тойрог хурдны замын ТЭЗҮ дуусах явцад гарч байгаа үнэлгээгээр 750 сая орчим ам.долларын төсөв гарч байна, магадлалууд хийгдэнэ. Төсвийн урьдчилгааны 15 хувийг "Эрдэнэс Монгол" компани ААН-ийн орлогын албан татварын нэг хувиараа төлж, Замын санд төвлөрүүлж өгч байгаа. Үлдсэн 85%-ийн санхүүжилтийг гүйцэтгэгч нь хямд эх үүсвэр олж барих буюу EPC+F нөхцөлтэй тендер зарлана" гэлээ.
Туулын хурдны болон нэгдүгээр тойрог замыг барьж ашиглалтад оруулснаар Улаанбаатар хотын түгжрэл 55%-аар буурна гэж тооцоолжээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
27 СЭТГЭГДЭЛТЭЙ
|
