Хотыг тойрсон малчидтайгаа хамтран малыг тууж гаргах ажил дөрөвдүгээр сар хүртэл үргэлжилнэ
Улаанбаатар хотын Ерөнхий менежер нийслэлийн хориглосон бүсээс мал гаргах ажлын талаар мэдээлэл өгч байна.
Нийслэлийн Засаг даргын захирамжаар ажлын хэсэг байгуулж, нэгдүгээр сарын 21-23-ны хугацаанд 396 албан хаагч, 53 тээврийн хэрэгсэлтэй ажиллан, нийт 4,557 толгой малыг хориглосон бүсээс гаргажээ.
Улаанбаатар хотын Ерөнхий менежер бөгөөд Захирагчийн ажлын албаны дарга М.Баяраа "Партизан зэрэг газраас Улаанбаатарт мал орж ирж байна. Холбогдох албаныхан эдгээр малыг гаргаж ажиллалаа. Нийслэлд мал орж ирснээр ногоон байгууламжийг эвдэн сүйтгэх, замын хөдөлгөөний нөхцөл байдал хүндрэх, осол гарах тохиолдол гарсан. Мөн гоц халдварт өвчний эрсдэлтэй тул нийслэлээс малыг гаргаж байна.
Дөрөвдүгээр сар хүртэл малыг тууж гаргах ажил үргэлжилнэ. Энэ удаад хотыг тойрсон малчидтайгаа хамтран энэхүү ажлыг зохион байгуулж байна.
Хотын Захирагчийн ажлын албаныхан дүүргүүд дээр ажиллаж, хорооны Засаг дарга нартай ногоон байгууламж, тохижилт үйлчилгээ, бүтээн байгуулалтын ажлын талаар санал солилцож байна. Өнөөдөр Сонгинохайрхан дүүрэгт ажилласан. Ирэх долоо хоногт Баянзүрх дүүрэгт ажиллана" гэв.
"Нийслэлээс малыг гаргаж байгаа нь ад үзэж байгаа зүйл биш" гэдгийг НЗД-ын хэвлэлийн төлөөлөгч Н.Сугар тодотгов.
ШУУД ҮЗЭХ:
