Lexus-ийн захирал Toyota корпорацыг удирдахаар боллоо
Дэлхийн хамгийн том автомашин үйлдвэрлэгч, Японы Toyota корпорац гүйцэтгэх захирлаа сольж байгааг өчигдөр орой зарласан нь гэнэтийн үйл явдал боллоо.
2009 оноос хойш тус компанийг удирдаж байсан Акио Тоёода дөрөвдүгээр сарын 1-нд албан тушаалаа Кожи Сатод шилжүүлэхээр болжээ.
Тоёода цаашдаа Тоуота корпорацын төлөөлөн удирдах зөвлөлийн даргаар ажиллах юм байна.
Одоо 66 настай Тоёода нь тус компанийг үүсгэн байгуулагч Кичиро Тоёодагийн ач хүү юм. Түүний аав Сойчиро Тоёода 1980-1990-ээд оны үед бас Toyota корпорацыг удирдаж байжээ.
Одоо 53 настай Сато нь харин үүсгэн байгуулагчтай ураг төрлийн холбоогүй хүн юм. Тэрбээр одоо Toyota-гийн тансаг ангиллын бүтээгдэхүүн үйлдвэрлэгч Lexus компанийн гүйцэтгэх захирлаар ажилладаг. Бас Toyota корпорацын брэнд хариуцсан дэд захирлаар давхар ажилладаг ажээ.
Сато 1992 онд механик инженерийн бакалаврын зэрэгтэй их сургууль төгссөнөөсөө хойш тасралтгүй Toyota корпорацад ажиллаж байгаа хүн юм.
Энэ удаагийн өөрчлөлтийг Toyota корпорацын хувьд томоохон үе шилжилт гэж үзэж байна.
Дэлхийн автомашин үйлдвэрлэлийн салбар цахилгаан хөдөлгүүрт хурдтай шилжиж буй цаг үед шинэ томилгоо болж байгаагаараа онцлог. Toyota корпорацын хувьд хайбрид хөдөлгүүрээр салбартаа хувьсгал хийж чадсан ч цахилгаан хөдөлгүүрийн эрин үед хоцорч яваа гэгддэг.
“Би өнгөрсөн 13 жилийн хугацаагаа эргэн харахад амар тайван өдөр ганц ч байсангүй. Гэхдээ би энэ хугацаанд урагшилж хөгжих бат бэх суурийг тавьж чадсан гэдэгтээ итгэлтэй байна” гэж Акио Тоёода өчигдөр Токиод болсон хэвлэлийн хурлын үеэр мэдэгджээ.
Эх сурвалж: AFP
