СУДАЛГАА: Сургуулийн насны хүүхдүүдийн дунд зан үйлийн эмгэгийн тархалт 5-20 хувьтай байна

Гэрэл зургийг mpa.mn

Ерөнхий боловсролын 107, 5 дугаар сургуулийн 60 гаруй багш мэргэжилтнийг оролцуулсан сэтгэцийн эрүүл мэндийн боловсрол олгох сургалт болжээ. Энэ үеэр аравдугаар сард хийсэн багш, сурагч, эцэг эхчүүдийн сэтгэцийн эрүүл мэндийн судалгааны үр дүнг ЭМЯ-наас танилцуулсан юм. 

Тус яамнаас БШУЯ, ХНХЯ болон бусад оролцогч талуудтай хамтран сэтгэцийн эрүүл мэнд ба халдварт өвчин, хоол тэжээл, агаарын бохирдол зэрэг шалгуураар Хүүхдэд ээлтэй сургуулийн индексийг боловсруулан гаргаж эхний ээлжид ЕБС-ийн 107, 5 дугаар сургуульд нэвтрүүлж, улмаар үндэсний хэмжээнд бүх сургуульд нэвтрүүлэх ба НҮБ-ын Хүүхдийн сан болон бусад доноруудтай хамтран ажиллах талаар мэдээлэв.

Сэтгэцийн эрүүл мэндэд тулгамдаж буй асуудлын 75 хувь нь 20 наснаас өмнө эхэлдэг. Өсвөр насанд зонхилон тохиолддог сэтгэцийн эмгэгүүдэд

• Сэтгэл түгшилт
• Сэтгэл гутрал
• Хооллох дурын эмгэг
• Зан үйлийн эмгэг (нийгмийн эсрэг зан үйл)
• Анхаарал дутмагшил
• Хэт хөдөлгөөнтэй болох
• Өөрийгөө гэмтээх асуудлууд хамаардаг.

Түүнчлэн сургуулийн насны хүүхдүүдийн дунд багаар бодоход гурван хувь нь хүнд хэлбэрийн сэтгэл гутрал, амиа хорлох бодол, солиорол, анхаарал дутмагшил, хэт хөдөлгөөнтэй болох зэрэг сэтгэцийн эмгэгтэй байна гэдгийг мэдээлэв.

Зан үйлийн эмгэгийн тархалт 5-20 хувь байгаа аж. Хөвгүүдийн 6-16 хувь, охидын 2-9 хувь нь зан үйлийн эмгэгтэй, хүйсийн хувьд хөвгүүд охидыг бодвол илүү байна. Харин газар нутгийн хувьд хөдөөг бодвол хотод илүү тохиолдож байна.

Уг сургалтыг Эрүүл Мэндийн Яам, Сэтгэцийн Эрүүл Мэндийн Үндэсний Төв болон “Гэрэл Плас Медиа Холдинг” компани хамтран зохион байгуулсан байна.