Уншиж байна ...
Зураг
Зураг
ХУУЧИРСАН МЭДЭЭ: 2022/12/08-НД НИЙТЛЭГДСЭН

Твиттерийн ажлын байрыг унтлагын өрөө болгох Маскийн шийдвэрийг Сан-Франциско хотын захиргаа шалгаж эхэлжээ

С.Мөнхцэцэг, ikon.mn
2022 оны 12 сарын 8
iKon.MN
Зураг зураг

Мягмар гарагийн өглөө ажилдаа ирсэн Твиттер компанийн ажилтнууд оффисын давхар бүрд унтлагын өрөө шинээр байгуулсныг харжээ.

Тэдгээрт орнуудаас гадна шөнийн гэрэлтүүлэг, амралтын тухлаг сандал зэргийг байрлуулсан байна.

Тус компанийг хоёр сар хүрэхгүй хугацааны өмнө худалдаж авсан тэрбумтан Илон Маск нэг шөнийн дотор ийм өөрчлөлт нэвтрүүлжээ.

Тэрбээр уртасгасан цагаар хонон өнжин ажилладаг хүмүүст дуртайгаа нуудаггүй. Эх сурвалжуудын мэдээлснээр Маск ийм ажилтнуудад зориулан давхар бүрд 4-8 унтлагын өрөө байгуулжээ.

Харин Лхагва гарагт Сан-Франциско хотын захиргааны барилгын хяналтын хэлтэс Твиттерийн оффист шалгалт явуулахаар болсноо мэдэгдсэн байна.

Хотын захиргаанд ирсэн хэд хэдэн гомдлын дагуу шалгахаар болсныг тус хэлтсийн олон нийттэй харилцах албаны захирал Патрик Ханнан мэдэгджээ.

“Бид бүх гомдлыг шалгана. Барилга зориулалтын дагуу ашиглагдаж байгаа эсэхийг бид хянах ёстой. Богино хугацаагаар байрлахыг оролцуулаад орон сууцны зориулалттай барилгад тавигдах шаардлага ажлын байрныхаас өөр байдаг. Энэ бол хүмүүсийн аюулгүй байдалтай холбоотой шаардлага юм. Сан-Франциско хотын оршин суугч бүр аюулгүй орчинд амьдарч, ажиллах эрхтэй. Хэн ч хуулиас гадуур байх ёсгүй” гэж тэр хэлсэн байна.

Шалгалтын дүгнэлт 72 цагийн дотор гарч, зөрчил илэрвэл зохих арга хэмжээг авах гэнэ.

 

Эх сурвалж: Business Insider