Бенгалын гал, салютаас үүдэлтэй галын аюулаас хамгаалах сургалт явуулав

Нийслэлийн Гэмт хэргээс урьдчилан сэргийлэх ажлыг зохицуулах зөвлөлөөс гаргасан удирдамжийн дагуу “Галын аюулаас урьдчилан сэргийлэх тухай” сургалтыг Нийслэлийн Онцгой байдлын газар, Сүхбаатар дүүргийн Онцгой байдлын хэлтэс явуулжээ.

Ингэхдээ Нийслэлийн Боловсролын хэлтэс, Засгийн газрын тусгай сан болох Цэвэр агаарын сан, “Цогт консалтинг” ХХК-тай хамтран ерөнхий боловсролын 35, 58 дугаар сургуулийн 6-9 дүгээр ангийн сурагчдын дунд зохион байгуулсан байна.

Сургалтаар ерөнхий боловсролын сургуулийн сурагчдын дунд гал түймрийн аюулаас урьдчилан сэргийлэх талаар арга зүйн зөвлөгөө өгч, галын аюул, хор уршгийн талаар мэдэх, гал гарч болзошгүй зүйлтэй болгоомжтой харьцах, цахилгаан хэрэгслийг зөв хэрэглэх мэдлэгтэй болох, баяр ёслолын үеэр хэрэглэдэг бенгалын гал, салют, динамит зэрэг зүйл нь найдваргүй бөгөөд болгоомжгүй үйлдлээс болж эрүүл мэнд, эд хөрөнгөөр хохирч болзошгүй, гал гарсан тохиолдолд ямар арга хэмжээ авах, галын дуудлагыг хаана хандаж мэдэгддэг талаар мэдээлэл олголоо. Сургалтад нийт 1200 гаруй сурагч, багш хамрагдсан байна.