Уншиж байна ...
ХУУЧИРСАН МЭДЭЭ: 2022/09/26-НД НИЙТЛЭГДСЭН

П.Гандолгор: Чадварлаг хүний нөөцөө алдахгүйн тулд ямар бодлого барих вэ гэдгээ бодох цаг болсон

Б.Бадамгарав, IKon.mn
2022 оны 9 сарын 26
iKon.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

УИХ-ын Нийгмийн бодлогын Байнгын хорооноос өнөөдөр "Халамжаас хөдөлмөрт" хэлэлцүүлгийг зохион байгуулж, тал бүрийн төлөөллийг оролцууллаа. 

Хэлэлцүүлгийн илтгэлүүдийг танилцуулж дууссаны дараа оролцогчид өөрсдийн байр суурийг илэрхийлэв. 

Хүний нөөцийн зөвлөх үйлчилгээний "Ганабелл" институтийн захирал П.Гандолгор "Компанийн захирал, хүний нөөцийн мэргэжилтнүүдтэй уулзахад хүн тогтохгүй байна гэдэг. Бизнесийн байгууллагууд тодорхой хэмжээний зардал гаргаад шинэ ажилтнаа сургаж байтал нөгөө хүн нь удалгүй Солонгос, Австрали явахаар болсон гээд ажлаасаа гардаг нөхцөл байдал үүссэн. 

Нөгөө талдаа улс орнуудын хувьд хамгийн эрч хүчтэй, чадварлаг ажиллах хүчнийг өөртөө татах уралдаан болж байна. 

Том зургаар нь харвал, бидний хөдөлмөрт бэлтгээд байсан хүмүүс өөр орны хөгжил цэцэглэлтийг бий болгохоор яваад, Монгол Улс хүнгүй болчих вий дээ. Айл бүхэнд нэг хүн Австрали, Япон, Солонгос явах бодолтой байгаа. Иймд чадварлаг хүний нөөцөө алдахгүйн тулд ямар бодлого барих вэ гэдгээ бодох цаг болсон" гэсэн юм. 

Ч.Тамир: Их, дээд сургуулиуд нийгэм, бизнесийн салбарын орлогоороо байгалийн ухааны салбараа авч явж байна

Монгол Улсын Их Сургууль(МУИС)-ийн Шинжлэх Ухааны Сургуулийн захирал Ч.Тамир "Халамжаас хөдөлмөрт гэх нэр нь популист санагдаж байна. Одоогоор халамж ихдээд байгаа учраас хөдөлмөр эрхлэх хүн багаслаа гэж нотлогдсон зүйл байхгүй. Монгол Улс халамжаасаа болоод хөдөлмөрлөдөггүй гэх дүгнэлт рүү ч хүрч мэдэхээр байна. 

Мөн байгалийн ухаанаар маш цөөн оюутан сурч байгаа гэж байна. Их, дээд сургуулиуд төрөөс ямар нэг дэмжлэг авахгүйгээр сургалтын төлбөрөөрөө үйл ажиллагаагаа явуулдаг. Өнөөгийн нөхцөл байдалд нийгэм, бизнесийн салбарын орлогоороо байгалийн ухааны салбараа авч явж байна. Хэрэв байгалийн ухааны салбар, тэр дундаа хими, физик, инженерийн салбараа дэмжье гэвэл мэргэжилтэн бэлтгэхэд шаардагдах дэмжлэг үзүүлэх ёстой" гэв. 

"Үйлдвэрлэл дээрх сургалтаа сэргээхийг хүсэж байна"

Барилгачдын үйлдвэрчний эвлэлийн хорооны дарга н.Батцогт "Үйлдвэрлэлийн салбарт ажлын байр их бий ч үүнд тохирох боловсон хүчин бэлтгэгдэхгүй байна. Гагнуурчин, машинист, тоног төхөөрөмжийн операторчин, цахилгаанчин, нарийн мэргэжлийн засварчид алга. Энэ бол МСҮТ-ийн асуудалтай холбоотой. МСҮТ-ийн багш нарыг гадаадад сургаж, мэргэшүүлэхэд анхаарах ёстой. Жишээлбэл, үйлдвэр дээрх сургалтаа сэргээхийг хүсэж байна" хэмээх саналыг тус тус хэллээ.