Францад 10 дугаар сард болох мал аж ахуйн үзэсгэлэнд манай улсын төлөөлөл оролцоно
Хүнс, хөдөө аж ахуй, хөнгөн үйлдвэрийн сайд Х.Болорчулуун Монгол Улс дахь Франц Улсын Элчин сайд Сэбастиен Сүрүнийг хүлээн авч уулзлаа.
Уулзалтаар хоёр орны хөдөө аж ахуйн салбарын хамтын ажиллагаа, ирэх 10 дугаар сард Франц Улсын Клермон-Ферран хотноо 31 дэх жилдээ уламжлал болон зохион байгуулах мал аж ахуйн олон улсын үзэсгэлэнд Монгол Улс 2022 оны “Хүндэт зочин орон”-оор оролцох бэлтгэл ажлын талаар ярилцав.
Монгол-Францын хөдөө аж ахуйн салбар дахь хамтын ажиллагаа сүүлийн жилүүдэд бизнесийн түвшинд идэвхжиж байна. Ялангуяа мах, сүүний чиглэлийн эрчимжсэн фермийн аж ахуйн технологийг нутагшуулах, малын үүлдэр угсааг сайжруулах, мал эмнэлгийн салбарын хамтын ажиллагаа өргөжүүлэх чиглэлд хөгжиж байгаа.
Хоёр орны хөдөө аж ахуйн салбар дахь хамтын ажиллагааны нөөц бололцоог бүрэн дүүрэн ашиглах, Францын техник, технологийг Монголд нэвтрүүлэх, нутагшуулахад чиглэсэн үйл ажиллагааг идэвхжүүлэх зорилгоор Монгол-Францын хөдөө аж ахуйн яам хооронд байгуулсан санамж бичгийн хүрээнд хоёр тал найрсаг хамтран ажиллаж байгаа билээ хэмээн ХХААХҮЯ-наас мэдээллээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
