45 иргэний амь нас, 50 сая төгрөгийн өмч хөрөнгийг авран хамгаалжээ

Гэрэл зургийг MPA агентлагийн онцгой зөвшөөрөлтэйгөөр ашиглав

Онцгой байдлын алба хаагчид нийслэлийн хэмжээнд өнгөрсөн долоо хоногт гал түймрийн 25, аюулт үзэгдэл, ослын найман дуудлагаар шуурхай үүрэг гүйцэтгэжээ.

Энэ хугацаанд аюулт үзэгдэл, ослоос найм, гал түймрийн утаажилтын бүсээс 45 иргэний амь нас, 50 сая төгрөгийн өмч хөрөнгийг авран хамгаалж, найман буцалтгүй нэрвэгдэгч /цогцос/-ийг цагдаагийн байгууллагад хүлээлгэн өгч ажилласан байна.

Нийслэлийн Засаг даргын 2022 оны “Үер, усны ослын аюулаас урьдчилан сэргийлэх талаар авах зарим арга хэмжээний тухай” А/778 дугаар захирамжийг хэрэгжүүлэх ажлын хүрээнд Туул, Хэрлэн, Тэрэлж голын эрэг дагуу мэргэжлийн байгууллагын хамтарсан бүрэлдэхүүн хөдөлгөөнт завьт эргүүлээр үүрэг гүйцэтгэж, голын усны ослоос урьдчилан сэргийлэх сэрэмжлүүлэг хүргэн ажиллаж байна. Энэ хүрээнд 6,185 иргэнд сэрэмжлүүлэг хүргэж /том хүн-4,331, хүүхэд-1,854/, ногоон бүсээс 718 автомашин холдуулан, аюулгүй байдлыг ханган ажиллажээ.

Аялал зугаалгын улирал үргэлжилж байгаатай холбогдуулан иргэдийн гол дагуу зорчих хөдөлгөөн ихсэж, голын усны ослын эрсдэл нэмэгдэж байгаа тул   

• Мэргэжлийн байгууллагаас өгч байгаа заавар, зөвлөмжийг дагах,
• Гол, мөрөн нуурын ойролцоо амарч зугаалахдаа сонор, сэрэмжтэй байх,
• Гэр бүл найз нөхөд, хамт олноороо амралт зугаалгаар явахдаа нэгдсэн зохион байгуулалттай, нэгнийгээ бүртгэдэг байх,
• Хүүхдийг гол усны эрэг дагуу явуулж, тоглуулахгүй байх, хүүхдэд тавих хараа, хяналтаа сайжруулах,
• Согтууруулах ундаа хэрэглэсэн үедээ гол усанд орохгүй байх,
• Баталгаатай гүүр, гарам, гарцтай газраар автомашинтай зорчиж аюулгүй байдлаа хангахыг анхааруулж байна.

Эх сурвалж: Нийслэлийн онцгой байдлын газар