Дайныг эсэргүүцсэн Оросын төв телевизийн сэтгүүлч ажлаас гарах өргөдлөө өгчээ

Даваа гарагт Оросын төв телевизийн мэдээний цагаар Украины дайныг эсэргүүцэх үзлээ илэрхийлсэн сэтгүүлч Марина Овсянникова ажлаасаа гарах өргөдөл өгсөн тухай өчигдөр мэдээлжээ.

Тэрбээр зоригтой үйлдлийнхээ төлөө олон цагаар байцаагдаж, 30,000 рублийн ($290) торгуулиар шийтгүүлсэн юм.

Гэхдээ Овсянникова шинээр батлагдсан хуулийн дагуу дайны талаар худал мэдээ цацсан үндэслэлээр олон жилийн хорих ял сонсож магадгүй байгаа.

Пүрэв гарагт тэрбээр France 24 сувагт ярилцлага өгөхдөө ажлаас гарахад шаардлагатай бүх бичиг баримтыг ОРТ сувгийн захиргаанд бүрдүүлж өгснөө мэдээлжээ.

Бага насны хоёр хүүхэдтэй Овсянникова гэр бүлийнхээ хувь заяаг эрсдэлд оруулж байгааг хүлээн зөвшөөрсөн ч “Энэхүү солиорлыг цөмийн дайн болгож хувиргахгүйн тулд ах дүүсийн хооронд эхэлсэн энэ дайныг зогсоох ёстой. Хүү минь том болоод намайг яагаад ингэснийг ойлгох байх гэж найдаж байна” гэж ярьсан байна.

Францын ерөнхийлөгч Эммануэл Макрон сэтгүүлч эмэгтэйг хуулийн хамгаалалтад авах, оршин суух эрх олгох боломжтойгоо үйл явдал болж өнгөрсний дараа мэдэгдсэн юм. Тэр бас ОХУ-ын ерөнхийлөгч Владимир Путинтэй утсаар ярихдаа уг асуудлыг хөндөхөө амлаж байв.

Харин Овсянникова гадаадад дүрвэхгүй, эх орондоо үлдэх бодолтой байгаагаа Германы Der Spiegel сэтгүүлд өчигдөр ярьжээ.

“Би эх орноосоо явах бодолгүй байна. Би эх оронч хүн, миний хүү бүр ч илүү эх оронч үзэлтэй. Бид хаашаа ч явах төлөвлөгөөгүй байна” гэж тэр ярьсан байна.

Овсянникова мэдээний шууд нэвтрүүлгийн үеэр эфирт “Дайныг зогсоо. Та бүхэнд худлаа ярьж байна. Суртал нэвтрүүлэгт битгий итгэ” гэсэн бичигтэй хуудас барьж гарч ирсэн юм.

Тэрбээр энэ үйлдлээ ганцаар төлөвлөсөн, өөр хэн нэгэн оролцоогүй гэж мэдүүлсэн байна. Гэхдээ тэр хамтран ажиллагсад нь түүний тэмцлийг ойлгож байгаа тухай өчигдөр хэлжээ.

“Төв телевизэд ажилладаг олон хүн юу болоод байгааг сайн ойлгож байгаа. Зарим нэг нь ажлаас гарах хүсэлтээ өгцгөөсөн. Гэхдээ эдийн засгийн нөхцөл хүнд байгаа тул ихэнхийнх нь хувьд ажлаа алдах хэцүү байгаа” гэж Овсянникова ярьсан байна.

Эх сурвалж: AFP