Нидерланд улс малынхаа тоо толгойг бууруулахад 25 тэрбум евро зарцуулахаар болжээ

Байгаль орчны бохирдлоос салахын тулд Нидерланд улсын засгийн газар малынхаа тоо толгойг эрс бууруулах 25 тэрбум еврогийн төлөвлөгөө баталжээ.

Нидерланд нь “дэлхийг тэжээдэг жижигхэн улс” хэмээх алдартай бөгөөд Европын хамгийн том мах экспортлогч, 100 сая гаруй үхэр, тахиа, гахайтай улс юм.

Газар нутгийн хэмжээтэй нь харьцуулбал малын тоо толгойн нягтрал нь Франц, Их Британиас дөрөв дахин их.

Гэвч мал амьтны ялгаруулсан баас хөрсийг бохирдуулснаар байгаль орчинд нь томоохон гамшиг үүсгэх болоод байгаа. Малын өтөг бууц нь азотын найрлагад ордог шивтрийг их хэмжээгээр үүсгэдэг. Тус улсын гол ус, хөрснөөс илэрсэн азотын хэмжээ Европын Холбоонд мөрдөгддөг зөвшөөрөгдөх түвшнээс хэтэрснийг мэргэжлийн байгууллагууд өмнө нь тогтоож байжээ.

“Хэрвээ бид баасандаа дарагдвал дэлхийг тэжээдэг жижиг улс байхаа болино” гэж Нидерландын эвслийн засгийн газрыг бүрдүүлдэг Ардчилал 66 намын тэргүүлэгчдийн нэг Терд де Грут ярьж байна.

13 жилийн хугацаанд хэрэгжих 25 тэрбум еврогийн хөтөлбөрийн хүрээнд үйл ажиллагаагаа сайн дураар зогсоосон фермерүүдэд нөхөн төлбөр олгох, цөөн малаар өндөр бүтээмжтэй ажиллах шинэ технологи нэвтрүүлэхэд нь туслах зэрэг ажлууд тусгагджээ.

Хөтөлбөр хэрэгжиж дуусахад Нидерланд улсын нийт мал сүргийн тоо толгой гуравны нэг хүртлээ буурсан байх юм.

Фермерүүдийн ихэнх нь аж ахуйгаа зогсоох бус, харин байгаль орчинд ээлтэй технологи руу хөрвөх замыг илүүд үзэж байгаа гэнэ.

“Бид дэлхийг тэжээх албагүй. Харин мал аж ахуйг яаж зөв, тогтвортой хөгжүүлж болдгийг харуулах ёстой” гэж сүүний фермийн эзэн Яргин Бруниа ярьжээ.

“Автомашинууд байгаль орчныг бохирдуулдаг ч инновацын тусламжтай өөрчлөгдөж байна. Бид ч бас ингэх ёстой” гэж Нидерландын Фермерүүдийн намыг үүсгэн байгуулагч Каролин Ван Дер Плас ярьж байна.

Европ тивд ганцхан Нидерланд биш, Дани, Бельги, Герман зэрэг улсууд мал амьтны  гаралтай бохирдлоо бууруулахын тулд ижил арга хэмжээ авахаар төлөвлөж байгаа.

Их Британи улс 2020 онд ийм төрлийн бохирдлоо 20 хувиар бууруулах зорилттой байсан ч биелүүлж чадаагүй байна. Тиймээс байгаль орчныг хамгаалах байгууллагууд тус улсын засгийн газрыг шүүхэд өгч болзошгүй болжээ.

Эх сурвалж: The Guardian