Дэлхийн хамгийн том компаниудын нэгний мэдээллийг барьцаалсан хакерууд $50 саяыг нэхжээ

Саудын Арабын төрийн өмчит газрын тосны Сауди Арамко компанийн нууц мэдээлэл хакеруудын гарт орж, барьцаалагджээ.

Мягмар гарагт хакеруудын вэбсайтад тус компаниас алдагдсан бичиг баримтуудын хэсгээс нийтэлж, $50 саяыг криптовалют хэлбэрээр төлөхгүй бол устгахаар сүрдүүлсэн юм.

Лхагва гарагт Сауди Арамко компанийн төлөөлөгч хэвлэлд ярихдаа хязгаарлагдмал хэмжээний мэдээлэл хакеруудын гарт орсон нь үнэн болохыг баталжээ. Гэхдээ Сауди Арамкогийн компьютерийн систем халдлагад өртөөгүй, гэрээт туслан гүйцэтгэгч компаниас алдагдсан гэж тайлбарласан байна.

“Мэдээлэл алдагдсан явдал нь манай системд халдлага гарснаас болоогүй. Манай үйл ажиллагаа хэвийн үргэлжилж, кибер аюулгүй байдал дээд хэмжээнд хангагдсан байгаа” гэж Сауди Арамко мэдэгджээ.

Компанийн мэдээллийг ямар хакерын бүлэг барьцаалсан нь одоогоор тодорхойгүй байна.

Нэгэн үе зах зээлийн үнэлгээгээрээ дэлхийн хамгийн том компани гэгдэж байсан Сауди Арамко одоо $1.9 их наядад үнэлэгддэг.

Одоогоор $2 их наяд гаруй үнэлгээтэй Apple компанийн ард жагсаж байна. Сүүлийн үед “ransomware” гэгддэг мэдээлэл барьцаалж, мөнгө нэхэх төрлийн гэмт хэрэг интернэт орчинд түгээмэл болжээ.

Эх сурвалж: Russia Today