Майкрософт компани Windows системийн алдарт “үхлийн цэнхэр дэлгэц”-ийг хар өнгөтэй болгожээ
BSoD (Blue Screen of Death) буюу “үхлийн цэнхэр дэлгэц” гэгддэг Windows системийн алдааны мэдээллийн дэлгэцийг Майкрософт компани хар өнгөтэй болгожээ.
Удахгүй зах зээлд нэвтрэх Windows 11 хувилбарт ийм өөрчлөлт орж буй тухай уг системийг туршиж буй мэргэжилтнүүд мэдээлсэн байна.
Алдааны цэнхэр дэлгэц гарсан тохиолдолд Windows систем гацаж, дахин эхлүүлэхээс өөр аргагүй болдог.
Ийм дэлгэцэнд юунаас болж системд алдаа гарсан талаар мэдээлэл агуулагддаг юм. 2016 онд Майкрософт компани алдааны дэлгэцэндээ дэлгэрэнгүй мэдээлэл өгөх QR код нэмж байв.
2012 онд Windows 8 системээс эхлээд “unhappy” сэтгэл хувирал илтгэсэн дүрсийг нэмжээ.
Харин хар дэлгэцэн дээр QR код болон “unhappy” дүрс хэвээр үлдсэн байна.
Windows 11 системийг удахгүй Windows 10 хэрэглэгчид үнэ төлбөргүй татаж ашиглах боломжтой болох юм.
Үүнд зөвхөн компьютерийн хүчин чадлын босго шаардлага тавигдана.
Харин одоогийн Windows 10 системийн хөгжүүлэлтийг Майкрософт 2025 онд зогсоохоор болжээ. Шинэ Windows систем яг хэзээ зах зээлд нэвтрэх талаар тодорхой хугацааг зарлаагүй байна.
Эх сурвалж: BBC
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
15 СЭТГЭГДЭЛТЭЙ
|
