Д.Мөнхцэцэг: Жирэмсний 28-32 долоо хоногтой эхчүүд коронавирусийн халдвараар өвчилбөл хүндэрч байна
Эрүүл мэндийн яамны ээлжит хэвлэлийн хуралд АШУҮИС-ийн Эх барих, эмэгтэйчүүд судлалын тэнхимийн эрхлэгч, доктор, дэд профессор Д.Мөнхцэцэг оролцож, мэдээлэл өглөө.
Тэрбээр "Халдвар гарснаас хойших хугацаанд иргэдийн дунд халдвараас өөрийгөө хэрхэн сэргийлэх талаар олон мэдээ, мэдээлэл түгээсэн ч сайн хэрэгжүүлэхгүй байна.
Ялангуяа сүүлийн үед жирэмсэн эмэгтэйчүүд коронавирусийн халдвараар өвчилж, хүндрэх эрсдэл их байна.
Иймд жирэмсэн эхчүүд дараах зөвлөмжийг дагах хэрэгтэй.
Үүнд,
- Шаардлагагүй тохиолдолд гэрээс гарахгүй байх,
- Гараа савантай усаар угаах, спирт агуулсан гар ариутгагчаар ариутгах
- Амны хаалт зүүх
- Хүн хоорондын зай барих
- Найз нөхөд, ах дүүтэйгээ утас болон цахим сүлжээгээр холбогдох, гэртээ хүн урихгүй байх,
- Өвчтэй хүмүүсээс аль болох хол байх
- Ажил олгогч нар жирэмсэн эмэгтэйчүүдийг гэрээсээ ажиллах боломжоор хангах
- Дархлаажуулалтад хамрагдах зэрэг зүйлс орно.
Түүнчлэн жирэмсэн эхчүүд олон нийтийн газраар аль болох явахгүй байхыг зөвлөе. Учир нь халдварын 50 орчим хувь нь шинж тэмдэггүй хэлбэрээр явагдаж буй тул бидний дунд хэн халдвар авсан нь мэдэгдэхгүй.
Мөн шинж тэмдэгтэй мөртлөө халдвар хамгааллын дэглэмээ барихгүй яваа хүн ойр байгааг байнга анхаарах ёстой.
Түүнээс гадна хүн хоорондын зай барих асуудал өнөөдөр Монголд хэрэгжихгүй байна. Тиймээс ч халдварын тохиолдол буурахгүй, өдөр ирэх тусам нэмэгдсээр байгаа юм" хэмээн ярив.
"Ихэр болон олон төрсөн жирэмсэн эмэгтэйчүүд коронавирусийн халдвараар хүндрэх эрсдэлтэй байна"
Үргэлжлүүлэн "Халдваргүй жирэмсэн болон халдвар авсан жирэмсэн эмэгтэйчүүдийг харьцуулбал эхийн эндэгдэл зарим улсад хоёр дахин нэмэгдсэн байна. Харин манай улсад одоохондоо нэг хувьд хүрэхгүй байгаа ч цаашид бид сэргийлэх ёстой.
Коронавируст халдварын хүнд хэлбэрээр 35-аас дээш насныхан илүү их өвдөж байна. Мөн жирэмсний 28-32 долоо хоногтой эхчүүд халдвар авсан тохиолдолд хүндэрч байгаа тул энэ үед нь онцгой анхаарах шаардлагатай.
Жирэмсний 28-32 долоо хоногт тухайн эмэгтэйн амьсгалын зам болон зүрх судасны тогтолцоо маш их ачаалалтай үе байдаг тул өвчин хүндрэхэд нөлөөлж байгаа.
Түүнээс гадна жирэмсний чихрийн шижинтэй бол хүнд хэлбэрээр өвдөх нь 66.1 хувьтай байгаа юм. Мөн ихэр болон олон төрсөн жирэмсэн эмэгтэйчүүд хүндрэх эрсдэлтэй байгааг анхаарах ёстой.
Халдварт өртсөн жирэмсэн болон жирэмсэн биш эмэгтэйчүүдийг харьцуулахад жирэмсэн эмэгтэйчүүдэд эрчимт эмчилгээ шаардагдах, зохиомол амьсгал хийгдэх тохиолдол илүү өндөр хувьтай байгаа. Мөн жирэмсэн эмэгтэйчүүд цар тахлын өмнөх үеэс 70 орчим хувиар сэтгэл гутралын түгшилттэй болсон гэх судалгаа бий. Энэ нь жирэмсний болон төрөх явцад сөргөөр нөлөөлнө гэж үзэж буй.
Тиймээс халдварын шинж тэмдэг илэрсэн жирэмсэн эмэгтэй маш яаралтай хяналтын болон ерөнхий эмчдээ хандаж эмнэлгийн тусламж авах хэрэгтэй. Түүнээс биш дур мэдэн ямар нэг эмчилгээ хийхгүй байхыг зөвлөж байна" гэсэн юм.
ВИДЕО:
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
