• 6 сарын 26, Ням
Уншиж байна ...
ХУУЧИРСАН МЭДЭЭ: 2021/04/19-НД НИЙТЛЭГДСЭН

NASA анх удаа дэлхийгээс өөр гарагийн тэнгэрт дрон нисгэж чадлаа

Р.Түвшин, iKon.mn
2021 оны 4 сарын 19
iKon.MN
Зураг зураг
Ingenuity дрон нисэж байхдаа өөрийн сүүдрийг буулгажээ

АНУ-ын сансар судлалын байгууллага NASA бага оврын дроныг Ангараг гарагийн тэнгэрт нисгэж чадсанаа дөнгөж сая мэдээллээ.

Ingenuity нэртэй жижиг дрон ердөө нэг минут хүрэхгүй хугацаанд нисээд амжилттай газардсан байна. Гэхдээ энэ нь хүн төрөлхтөн дэлхийгээс өөр гарагийн тэнгэрт өөрийн бүтээсэн техникийг нисгэсэн анхны тохиолдол тул түүхэнд бичигдэх үйл явдал юм.

Ангараг гарагийн тойрог замд байгаа хиймэл дагуул дроны төлөвийг дэлхий рүү дамжуулснаар туршилт амжилттай болсныг мэдсэн байна.

NASA цаашдаа илүү урт нислэг үйлдэж, дроныхоо чадварыг хязгаарт нь тултал шалгах юм.

Ангараг гарагийн тэнгэрт дрон хөөргөх амар биш. Тус гарагийн агаар мандал нь маш сийрэг, дэлхийн агаар мандлын нягтын ердөө 1 хувьтай тэнцэх нягттай.

Тиймээс агаарт хөөрөхийн тулд дрон илүү их хүч гаргана гэсэн үг. Ingenuity дроны жин маш бага, сэнс нь маш хурдтай эргэдэг нь ийм учиртай.

Тодруулбал сэнс нь минутад 2,500 удаа эргэдэг ажээ.

Өнөөдрийн туршилт амжилттай болсон нь цаашид сансрын дрон хэмээх технологийн шинэ салбар хөгжих эхлэлийг тавьж байна.

NASA дараагийн ээлжинд Санчир гарагийн Титан нэртэй сар руу илгээх судалгааны станцдаа дрон багтаахаар төлөвлөжээ. Уг аялал 2030-аад оны дундуур эхлэх юм.

 

Эх сурвалж: BBC