Баянзүрх дүүргийн 17 дугаар хороонд коронавирусийн халдвар голомтлон тархаж болзошгүй нөхцөл байдал үүссэн тул нэгдүгээр сарын 16-ны 23:00 цаг хүртэл хязгаарлалтын дэглэм тогтоосон. Энэ хугацаанд 18-аас дээш насны бүх иргэнийг шинжилгээнд хамруулах юм.
Тус хороонд гарсан халдварын эх үүсвэр, үүсээд буй нөхцөл байдлын талаар ЭМЯ-ны яамны ээлжит мэдээллийн цагаар тодрууллаа.
ХӨСҮТ-ийн Тандалт, шуурхай удирдлагын хэлтсийн дарга А.Амбасэлмаа "Баянзүрх дүүргийн 17 дугаар хороонд өвчлөл голомтлон гарсан. Холоос үргэлжилсэн хэлхээтэй өвчлөл. Баянзүрх нэгдсэн эмнэлэг, буяны ажилтай холбоотой, Тэнүүн-Огоо компанийн өвчилсөн ажилтны гэр бүл, хавьтлууд нь нь тус хороонд амьдардаг. Мөн Баянзүрх нэгдсэн эмнэлэгтэй холбоотой хоёр батлагдсан тохиолдолтой эх үүсвэр гарч, үргэлжилсэн хэлхээгээр өвчлөл бүртгэгдсэн.
Харин 9 дүгээр хороо нь 17 дугаар хороотой зэргэлдээ оршдог бөгөөд 17 дугаар хорооны батлагдсан тохиолдолтой найз нөхдийн холбоотой, хамт ажилладаг гэх мэтчилэн холбогдсон тохиолдол байна" гэлээ.