Эрчим хүчний сайд Б.Чойжилсүрэн төсвийн хөрөнгийг зориулалтын бусаар зарцуулсан уу?

Гэрэл зургийг MPA агентлагийн онцгой зөвшөөрөлтэйгөөр ашиглав

УИХ-ын гишүүн, Эрчим хүчний сайд Б.Чойжилсүрэн өнгөрсөн долдугаар сарын 30-нд Увс аймгийн 100 жилийн ойн наадмын үеэр ТВ9 телевизийн шууд дамжуулалтын үеэр "Улаангомын цэнгэлдэх, төв замын гэрэлтүүлэг зэргийг шийдвэрлэхэд миний багцаас ₮2 тэрбумыг зарцуулсан" гэж ярьсан нь олны анхаарлыг татсан юм. 

Сайдын ярилцлага бүтэн:

Тэгвэл сайдын "багц" гэж танилцуулсан нь улсын төсөвт тусгагдсан эсэх талаар "Оч хуулийн фирм"-ийн хуульчаас тодруулж дараах мэдээллийг авлаа.

Сайдын "багц" гэж юу вэ?

 

Б.Чойжилсүрэн сайдын онцолсон "багц" нь 2025 оны улсын төсөвт суулгасан Эрчим хүчний сайдын нийт төсөв нь ойролцоогоор ₮365 тэрбум. Үүний ₮136 орчим тэрбум нь урсгал зардалд үлдсэн нь тус яамнаас 2025 онд хийх ажлыг санхүүжүүлэх мөнгө гэсэн үг.

Харин энэ дунд сайдын онцолсон Увс аймгийн Улаангом сум "сураггүй".

Сайд хууль зөрчсөн үү?

 

Гэрэл зургийг MPA агентлагийн онцгой зөвшөөрөлтэйгөөр ашиглав

Төсөвт тусгагдаагүй хөрөнгийг аймагтаа зарцуулсан нь хуулиар нотлогдвол эрүүгийн хариуцлага хүлээх хууль манайд бий. Тухайлбал Эрүүгийн хуулийн 22.8 дугаар зүйлд Төсвийн хөрөнгийг зориулалтын бусаар зарцуулахад дурдсан байдаг. 

1.төсөв захирагч төрийн өмч, төсвийн хөрөнгийг

• 1.1 зориулалтын бусаар зарцуулсан бол, 

Мөн уг хуулийн 2-т зааснаар энэ гэмт хэргийн улмаас их хэмжээний хохирол учирсан бол нийтийн албанд ажиллах эрхийг хоёр жилээс найман жил хүртэл хугацаагаар хасаж, хоёр жилээс найман жил хүртэл хугацаагаар хорих ял шийтгэнэ гэж тодорхой заасан байдаг.

Өнгөрсөн сарын эхээр Үндэсний Аудитын Газар (ҮАГ)-аас санхүүгийн хяналт, шалгалтын дүнд илэрсэн зөрчлийн талаар мэдээлэхдээ "Төсвийн хөрөнгийг зориулалтын бусаар зарцуулах асуудал байсаар байна" гэж байв. 

Ижил төстэй шийдэгдсэн хэргүүд

• Булган аймгийн эрүүгийн хэргийн анхан шатны шүүхээс Б.М, Б.Э нарт холбогдох хэргийг 2020 оны зургаадугаар сард шийдсэн байдаг. Тодруулбал шүүгдэгч Б.М-ийг аймгийн ...-ээр ажиллаж байх хугацаандаа нэр бүхий иргэдийг ажилласанд тооцож, цалин болох ₮6.3 саяыг буюу төсвийн хөрөнгийг зориулалтын бусаар зарцуулсан гэж шүүх үзсэн байна.  
• Ингээд Эрүүгийн хуулийн тусгай ангийн 22.8 дугаар зүйлийн 1 дэх хэсгийн 1.1-т зааснаар шүүгдэгч Б.М ийг нийтийн албанд томилогдох эрхийг 2 /хоёр/ жилийн хугацаагаар хасаж, 7,000 нэгж буюу 7.000.000 (долоон сая) төгрөгөөр торгох ялаар шийтгэх шийдвэр гаргаж байв. 
• Давж заалдах шатны шүүхээс уг хэргийг цагаатгасан байдаг.

Уг хэргийн дэлгэрэнгүйг ЭНД-ээс үзэх боломжтой. 

• Мөн нэр бүхий нэгэн аймгийн цагдаагийн байгууллагад удирдах албан тушаалд ажиллаж байсан Б.Г нь Хүрээлэн буй орчны эсрэг гэмт хэргээс урьдчилан сэргийлэх байнгын ажиллагаатай хөдөлгөөнт 4 цэгүүдийн үйл ажиллагааны зардал 70,000,000 төгрөгийг ... аймгийн ... сумын Засаг даргын захирамжаар 2022 оны 07 дугаар сарын 29-ний өдөр ... аймаг дахь Ц-гийн газрын төрийн сангийн ... тоот дансанд хүлээн авч, тус гэмт хэргээс урьдчилан сэргийлэх ажлын төсвөөс 30,000,000 төгрөгийг 2022 оны 08 дугаар сарын 09-ний өдөр Дархан-Уул аймагт үйл ажиллагаа явуулдаг “...” ХХК-ийн Хаан банкны .... дугаартай данс руу шатахууны талон авахаар шилжүүлж, урамшуулалд нь 900,000 төгрөгийн шатахууны талоныг нэмж нийт 30,900,000 төгрөгийн шатахууны талон авсан, 2022 оны 08 дугаар сарын 15-ны өдөр шатахууны талоныг бэлэн мөнгө болгон, ... аймгийн ... суманд байрлах Ц-гийн газрын албаны байрны өрөө тасалгааны засварт 16,520,000 төгрөг, хурлын заалны сандалд 13,200,000 төгрөг, Ц-гийн газрын үүдний хүлээлгийн сандал, ширээ 1,180,000 төгрөгөөр тус тус худалдан авч төсвийн хөрөнгийг зориулалтын бусаар зарцуулж төсөвт нийт 30,000,000 төгрөгийн хохирол учруулсан гэмт хэрэгт холбогджээ.
• Аймаг дахь сум дундын эрүүгийн хэргийн анхан шатны шүүх Б.Г-ийг Эрүүгийн хуулийн тусгай ангийн 22.8 дугаар зүйлийн 1.1-д заасан “Төсөв захирагч төрийн өмч, төсвийн хөрөнгийг зориулалтын бусаар зарцуулсан” гэмт хэрэг үйлдсэнд гэм буруутайд тооцож, нийтийн албанд томилогдох эрхийг нэг жилийн хугацаагаар хасаж, 5,400 нэгжтэй тэнцэх хэмжээний буюу 5,400,000 төгрөгөөр торгох ял оногдуулж, уг ялыг хоёр жилийн хугацаанд хэсэгчлэн төлүүлэхээр тогтоожээ. 
• Харин хяналтын шатны шүүхээс хэргийг цагаатгасан. Дээрх шийдвэр нь гэмт хэрэг хийгээгүй гэж үзээгүй, шүүх хүнлэг, энэрэнгүй ёсыг дагах үүднээс цагаатгаж шийдсэн байдаг.

Тус хэргийн дэлгэрэнгүйг ЭНД-ээс үзэх боломжтой.