Эрүүл мэндийн яамны мэдээллийн ээлжит цагаар ЭХЭМҮТ-ийн Яаралтай тусламжийн тасгийн их эмч Б.Номин суулгалт өвчний талаар зөвлөгөө мэдээллийг хүргэлээ.
Энэ нь халдварын ба халдварын бус шалтгаантай. Улирлын томуу, томуу төст өвчний үед 0-5 насны хүүхдэд зонхилон тохиолддог.
Ротавирус-Вирусийн гаралтай суулгалт өвчний 70-80 хувийг ротавирусийн гаралтай суулгалт өвчин эзэлдэг. Манай орны хувьд 5, 6, 9, 10, 11 сард өндөр тархалттай байдаг. Энэ өвчний үед их хэмжээний усархаг, олон тоотой шингэн баадаг.
Аденовирус-Амьсгалын дээд замын цочмог халдвар өвчинтэй хавсарч явагдана.
Энтеровирус-Амны салст гэмтэх, гар хөлөөр гүвдрүүт тууралт гарах, эхний гурав хоногт өндөр халуурах гэх мэт вирусийн шинж чанараас хамаарч, харилцан адилгүй шинж тэмдгүүд илэрнэ.
Суулгалт өвчнөөс урьдчилан сэргийлэхийн тулд улирлын томуу, томуу төст өвчин нь вирусийн гаралтай халдвар учир амны хаалтыг зөв зүүж хэвших, гараа сайтар угаах хэрэгтэй.
Үндсэн суулгалт өвчний үед томуу, томуу төст өвчинтэй зэрэгцүүлж, вирусийн эсрэг эмийн эмчилгээ шаардлагагүй. Энэ үед шингэн нөхөх эмчилгээ нь үндсэн эмчилгээ болдог.