Д.Батдорж: АТГ-аас Н.Учрал гишүүний аавдаа авч өгсөн зээлтэй холбоотой асуулгын хариу ирлээ
Жижиг дунд бизнес эрхлэгч залуучуудын зүгээс ЖДҮДС-гаас зээл авсан гишүүдийн хэрэг хэрхэн шийдэгдэж байгаа талаар Авлигатай тэмцэх газарт гишүүн тус бүрийн нэрээр асуулга хүргүүлж буй аж.
Асуулгын хариу нь эхнээсээ ирж буй бөгөөд УИХ-ын гишүүн Н.Учралтай холбоотой асуулгын хариу ирсэн талаар Жижиг дунд үйлдвэрлэл эрхэлдэг залуучуудын төлөөлөл өнөөдөр мэдээлэл хийлээ.
Энэ талаар Жижиг дунд бизнес эрхлэгч залуучуудын төлөөлөл, иргэн Д.Батдорж “Бид гуравдугаар сарын 24-нд УИХ-ын гишүүн Н.Учрал гишүүний аавдаа авч өгсөн 50 сая төгрөгийн зээлтэй холбоотой байцаалт, шалгалтын ажлын явц хэрхэн явагдаж байгаа талаарх асуулгыг АТГ-т хүргүүлсэн. Өнөөдөр уг асуулгын хариу ирсэн ба тухайн хэрэг нь шалгагдаж байгаа юм байна.
Энэ сарын 13-нд болсон МАН-ын бүлгийн хуралд Ерөнхий сайд У.Хүрэлсүх ЖДҮ-тэй нэр холбогдсон хүмүүсийг УИХ-д нэр дэвшүүлэхгүй гэдгээ албан ёсоор мэдэгдсэн. Удирдах зөвлөлийн шийдвэр нь ч тэгж гарсан. Тэгэхээр Н.Учрал гишүүн нэр дэвших эрхгүй болсон гэж бид ойлгож байгаа. Бид эхний хариу өгсөн хүнээ мэдээллээ. Өнөөдөр бас нэг хүний хариу гарсан ирж аваарай гэсэн. Өнөөдөр очиж аваад удахгүй мэдээлнэ.
Удирдах зөвлөлөөс нэрийг нь гаргасан ЖДҮ-тэй холбогдсон 32 гишүүний мэдэгдэл гаргасан. Бид 23 дахь гишүүний асуулгыг АТГ-т хүргүүлээд явж байна. Цаашид ч хүргүүлнэ. Бид ганц Н.Учрал гишүүнийг онцлоогүй. Миний хувьд гэхэд зургаан удаа зээл хүссэн боловч бүтээгүй. Ер нь жижиг дунд бизнес эрхэлдэг залуучууд бухимдалтай байгаа. Гэхдээ бид олны яриад байгаа шиг 100 хүн цуглуулсан асуудал байхгүй гэдгийг хариуцлагатайгаар хэлье. Цаашид хариу ирэх бүрт мэдээллийг өгнө. Бид сонгууль дөхөөд энэ асуудлуудыг гаргаагүй” гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
35 СЭТГЭГДЭЛТЭЙ
|
