Уншиж байна ...
ХУУЧИРСАН МЭДЭЭ: 2019/08/20-НД НИЙТЛЭГДСЭН

"Үндэсний төв цэнгэлдэх хүрээлэн”-г байгуулах төсөлд шалгарсан загвар зураг

Г.Өлзийхутаг, iKon.mn
2019 оны 8 сарын 20
iKon.MN
Зураг зураг

 "Үндэсний төв цэнгэлдэх хүрээлэн” байгуулах төслийн концепц, загвар зургийг боловсруулах уралдааны явцын талаар өнөөдөр Нийслэлийн Хот байгуулалт хөгжлийн газраас мэдээллээ. 

 
Гэрэл зургийг Mpa.mn

Монгол Улсын Ерөнхий сайдын 2019 оны долоодугаар сарын 9-ний өдрийн 94 дүгээр захирамжаар олон улсын жишигт нийцсэн 50-60 мянган хүний суудалтай, битүү дээвэр бүхий Үндэсний төв цэнгэлдэх хүрээлэн барих асуудлыг судалж, холбогдох санал шийдвэрийн төслийг боловсруулах ажлын хэсгийг байгуулсан билээ.

Үүнтэй холбоотойгоор Нийслэлийн засаг даргын 2019 оны А/787 дугаар захирамжийг үндэслэн нийслэлийн Хот байгуулалт хөгжлийн газраас тус уралдааныг зохион байгуулж байгаа аж.

Олон нийтийн санал асуулгад нийт 24,295 иргэн оролцсон байна

 
Гэрэл зургийг Mpa.mn

Нийслэлийн Хот байгуулалт хөгжлийн газрын орлогч дарга Ц.Тулга  "Улаанбаатар хотын 2040 оны ерөнхий төлөвлөгөөний ажлууд хийгдэж байна. 2040 оны ерөнхий төлөвлөгөөний ажил нь гурван үе шаттайгаар хийгдэх бөгөөд өнгөрсөн жил урд нь хийгдсэн ерөнхий төлөвлөгөөндөө үнэлэлт дүгнэлт өгсөн. Харин энэ жил концепцийг боловсруулах ажлууд хийгдэж байна.

Мөн 2020 онд Улаанбаатар хотыг 2040 он хүртэлх хөгжүүлэх ерөнхий төлөвлөгөөний боловсруулах ажил хийгдэх ёстой. 

Бид өнгөрсөн тавдугаар сард иргэдийн оролцоог хангах үүднээс Д.Сүхбаатарын талбайн өмнө байрлах 2.5 га газар дээр авто зогсоол, усан оргилуур бүхий тохижилтын ажлын төслийн уралдааныг мөн зохион байгуулсан. Шалгарсан төсөл нь ирэх жилээс бүтээн байгуулалтын ажилдаа орохоор төлөвлөгдсөн байна.

Харин энэ удаа бид Төв цэнгэлдэх хүрээлэн байгуулах төсөл дээр уралдаан зарлаад байна. Уралдаанд нийт есөн бүтээл ирүүлсэн.

Нийслэлийн Засаг даргын захирамжаар томилогдсон уралдааныг дүгнэх үүрэг бүхий комиссын гишүүд тус бүтээлүүдийг удирдамжийн дагуу таван шалгуураар оноо өгч дүгнэх юм.

Үүнд:

  • Төслийн үзэл санаа, шинэлэг байдал,
  • Үндэсний онцлог, түүх, соёлын хэв шинжийг тусгасан байдал,
  • Байгаль орчинд ээлтэй, орчин үеийн технологийн шийдэл тусгасан байдал,
  • Ажлын гүйцэтгэл, иж бүрдлийн шаардлагыг хангасан байдал,
  • Олон нийтийн санал гэсэн шалгуур багтаж байна.

Олон нийтээс санал авах шалгуурыг энэ сарын 16-19-ний өдөр www.uda.ub.gov.mn сайтаар нээлттэй явуулж дууслаа. Олон нийтийн санал асуулгад нийт 24,295 иргэн оролцож, санал өгсөн байна. Харин одоо ажлын хэсэг хуралдаж үлдсэн шалгуурууд дээр оноо өгч дүнгээ гаргана" гэв.

Тус уралдааны эхний шалгуур буюу олон нийтийн санал асуулгын дүн:

Нэгдүгээр багийн төсөл 256

 

Хоёрдугаар багийн төсөл 5,959

 

Гуравдугаар багийн төсөл 2,210

 

Дөрөвдүгээр багийн төсөл 5,485

 

Тавдугаар багийн төсөл 260

 

Зургаадугаар багийн төсөл 7,791

 

Долоодугаар багийн төсөл 163

 

Наймдугаар багийн төсөл 367

 

Есдүгээр багийн төсөл 1,804 саналыг тус тус авсан байна.