Хүүхдүүд долоон настайгаасаа КОД БИЧИЖ сурч байна

Бүтээлчээр сэтгэх, аливаа асуудлын шийдлийг олж харах, мэдээ мэдээллийг хүлээн авахдаа олон талаас тунгаан, дүгнэлт гаргах зэрэг сурагчдын чадварыг хөгжүүлж, ирээдүйн хөдөлмөрийн зах зээлд өрсөлдөхүйц иргэдийг бэлтгэх үүднээс программчлал, код бичих STEAM /Science, Technology, Engineering, Arts, Mathematics/ төрлийн сургалтууд сүүлийн үед манай улсад олноор үүд хаалгаа нээж, үйл ажиллагаа явуулах болсон билээ.

Тэгвэл эдгээр сургалтын нэг “Kids Code Academy” буюу Багачуудын Код Академи өнгөрөгч аравдугаар сараас үйл ажиллагаагаа явуулж эхэлсэн бөгөөд 7-8, 9-12 болон 12-оос дээш насны хүүхдүүдэд зориулсан программчлал, электроник болон сэтгэл зүйн чадамж зэргийг хамруулсан цогц сургалт явуулж байгаа аж.

Ерөнхий боловсролын сургуулийн сурагчдын амралт болж байгаатай холбоотойгоор "Кидс Код Академи" ХХК, “Хамтын Дэлбээ" ТББ болон Санхүү, эдийн засгийн их сургуулийн Мэдээллийн системийн менежментийн тэнхим хамтран Монголд анх удаа өсвөр насны сурагчдад зориулсан "Өсвөрийн судлаач: Coding Bootcamp" үйл ажиллагааг өнгөрөгч 16-19-ний өдрүүдэд амжилттай зохион байгууллаа.

 

Гэрэл зургийг: MPA.mn

 "Энэ удаа зохион байгуулсан "Өсвөрийн судлаач” үйл ажиллагаа нь олон талаараа шинэлэг. Өсвөр насны хүүхдүүд программчлалын ертөнцтэй танилцаж, алгоритм боловсруулж сураад зогсохгүй нийгмийн ухааны сэдвийн хүрээнд судалгаа хийж, төслийн санаа гаргаж, өөрсдөө контент /анимейшн/ бүтээсэн. Мөн хамтран ажиллаж, салбарын мэргэжилтэн, судлаачдын удирдлага дор өөрсдөдөө тулгарч буй асуудлуудад шийдэл эрэлхийллээ.

Сургалтанд 12-14 насны 6-8 дугаар ангийн сурагчид хамрагдаж байгаа юм. Дунд ангийн сурагчдыг хамруулах болсон шалтгаан нь сурагчид энэ үеэс байгалийн болон хүмүүнлэгийн ухааны олон шинэ хичээлүүдийг үзэж эхэлдэг. Гэвч эдгээр хичээлийг сурагчид бодит амьдрал дээр хэрхэн, яаж ашиглах ухаанаас илүүтэй онол түлхүү заалгасаар төгсдөг нь тухайн хичээлээ илүү гүнзгий судлах сонирхолгүй болгож байх шиг. Иймд бид сурагчдад өдөр тутам үздэг хичээлүүдийг нь илүү хэрэглээ, бодит асуудалд тулгуурлан, сонирхолтой байдлаар хүргэхийг хүссэн" гэж "Кидс Код Академи" ХХК-ийн Гүйцэтгэх захирал Э.Сүндарь ярьж байлаа. 

Кидс Код Академийн энгийн сургалт нэг ангидаа 10 хүүхдийг авч хичээллэдэг байна. Ингэснээр сургалтын хүртээмж, чанар илүү сайжрах боломж бүрддэг ажээ.

"Бид сургалтаа богино хэмжээний модуль болох программчлал, электроникийн агуулгаас суралцуулахын хажуугаар хүүхдийн бүтээлч сэтгэхүйг нь хөгжүүлэх нийгмийн салбарын сургалт, агуулгыг орхигдуулдаггүй.

 

Гэрэл зургийг: MPA.mn

Зарим хүн зөвхөн инженерчлэл, программчлал чухал, эсвэл нийгмийн ухааны хичээл л чухал гэж үзэх нь түгээмэл. Гэвч энэ нь өрөөсгөл ойлголт аж.

Ялангуяа, манай улсад бага насны хүүхдүүд бага наснаасаа бие даан ажиглалт, судалгаа хийх, аливаа зүйлд шинжлэх ухаанч байдлаар хандах, аливаа зүйлийн цаад утга учрыг ойлгох хандлага дутагдаж байгаа нь ажиглагдах болсон. 

Энэ нь цаашлаад нийгмийн сүлжээнд худал мэдээллийг нягталж үзэлгүйгээр олон мянгаар нь бусдад түгээх зэргээр иргэдийн дунд илэрч байна гэж бид харж байгаа. Үүнээс харахад бид хүүхдүүдэд багаас нь аливаа мэдээллийг үнэн эсэхийг шалгах, тунгаан бодох, тухайн мэдээллийн цаана ямар хүн, ямар зорилготойгоор түгээж байгаа зэргийг ялгаж, салгах наад захын чадвартай болгох шаардлагатай болж байна. 

Тийм ч учраас программчлал, шинжлэх ухаан болон нийгмийн ухааны сургалтыг хослуулах нь зүйтэй юм" гэж Э.Сүндарь ярьж байв.

Энэ удаагийн сургалтад оролцсон 50 сурагч нийт 11 багт хуваагдан, салбар салбарын менторуудын дор, өөр өөр сэдвээр судалгаа хийж ажилласан юм. 

Сэдвүүдэд орчин үед тулгамдаад буй хотжилт, хог хаягдал, үе тэнгийнхний дээрэлхэлт, хүний эрх, үүрэг, цахим орчны аюулгүй байдал, эрүүл мэнд зэрэг сэдэв багтсан ба хүүхдүүд нарийвчилсан судалгаа хийсний үр дүнд сэдвийнхээ хүрээнд багаараа аннимейшн бүтээж, эцэг, эхчүүддээ тайлагналаа.

Ингэснээр сурагчид зөвхөн программчлал, кодингийг сураад зогсохгүй программчлалын чадвараа ашиглан контент бүтээж, судалгаа хийж, тодорхой нэг сэдвээр өргөн мэдлэгтэй болж байна гэсэн үг юм. 

 

Орчлон сургуулийн 8A ангийн сурагч Г.Төрбилэг "Энэхүү сургалтад сууснаар би программчлалын "Scratch" программыг илүү гүнзгий судалж, анхан шатны мэдлэгтэй боллоо. Энэ нь программчлалын хэлний илүү хялбарчилсан, анхан шатны хувилбар гэж хэлж болно. Мөн сургалтаар дамжуулан олон найз, нөхөдтэй боллоо" гэв.

 

Гэрэл зургийг: MPA.mn

"Хог боловсруулах" сэдвийн дор нэг баг болж ажилласан О.Шинэтунгалаг, Д.Анужин, М.Энхпүрэв нар "Сургалтад сууснаар алгоритм боловсруулж, код бичиж сурсан. Манай баг найман хүний бүрэлдэхүүнтэй. Дөрвөн эрэгтэй, дөрвөн эмэгтэй гишүүнтэй. Бидний хувьд Монголын хог хаягдлыг хэрхэн бууруулах болон дахин боловсруулах талаар гүнзгийрүүлэн судалсан байгаа.  

Бид энэхүү багт орж, хог хаягдлын талаар судалсны үр дүнд өөрт хэрэггүй, онцын шаардлагагүй зүйлсийг худалдаж авахгүй байх, дахин хэрэглэгдэх усны савыг байнга өөртөө авч явах, гялгар уутны оронд даавуун тор хэрэглэх, хогоо ил задгай хаяхгүй байх, ангилж сурах зэрэг дадлыг өөртөө хэвшүүлэх талаар аннимейшн хийсэн" хэмээлээ.

Сүүлийн үед эцэг, эхчүүд хүүхдээ заавал онц сурах, шилдэг сурагч болгох гэж шахахын оронд хүүхдийг өөрийнх нь хүссэн зүйлд суралцуулж, ирээдүйд юунд сонирхолтой, ямар мэргэжилтэй хүн болохыг нь тодорхойлоход илүү туслах тал дээр анхаарлаа хандуулдаг болсон нь ажиглагдах болсонд туйлын баяртай байгаагаа зохион байгуулагчид онцолж байлаа.

Тийм ч учраас тус сургалтаар дамжуулан сурагчдад цаашид эзэмших мэргэжил, хийх ажлаа тодорхойлох, ямар салбар, чиглэлд сонирхолтой зэргээ мэдэж, ойлгоход нь туслах бол тэдний бас нэг зорилго гэдгийг дурдаж байв. 

 

Гэрэл зургийг: MPA.mn