Шударга өрсөлдөөн, хэрэглэгчийн төлөө газраас өнөөдөр цаг үеийн шинжтэй зарим хяналт шалгалтын ажлуудын талаар мэдээлэл хийлээ. Мэдээллийг ШӨХТГ-ын хэрэглэгчийн эрхийг хамгаалах газрын дарга Ш.Цэрэндулам танилцуулав.
Шударга өрсөлдөөн, хэрэглэгчийн төлөө газрын хяналт, шалгалтын ажлын хэсэг энэ оны наймдугаар сарын 6-ны өдөр шатахууны жижиглэнгийн худалдаа эрхлэгч 9 аж ахуйн нэгжүүдийн борлуулж буй АИ-92 автобензинээс дээж авч сорилт шинжилгээний лабораторид шинжлүүлжээ. Үүнд:
Шинжилгээний үр дүнгээр дээрх 9 аж ахуйн нэгжүүдийн борлуулж буй АИ-92 автобензин дэх марганецын агууламж 0.6-0.9 мг/дмЗ байгаа нь тодорхойлогдсон байна. Мөн хэд хэдэн аж ахуйн нэгжийн жижиглэнгээр борлуулж буй АИ-92 автобензин октан тоондоо хүрээгүй байна.
Тиймээс ШӨХТГ-аас дээрх 9 аж ахуйн нэгжид холбогдох зөрчлийн хэрэг нээж шалгахад жижиглэнгээр борлуулж буй АИ-92 автобензин нь "Хөдөлгүүрийн түлш, этилжүүлээгүй бензин, техникийн шаардлага MNS 0217:2017" хэмээх Монгол Улсын стандартын шаардлагыг хангахгүй байгаа нь тогтоогджээ. Тус 9 аж ахуйн нэгжид тус бүр 9,000,000 төгрөгийн шийтгэл ногдуулсан байна.
Энэ онд “Хэрэглэгчийн мэдээллийн 1800-1284 төв”-д арилжааны банкуудын үйл ажиллагааны талаар 74 санал, гомдол, мэдээлэл хэрэглэгчдээс иржээ.
Тодруулбал, арилжааны банкуудтай холбоотой шимтгэл хураамж, зээлийн эргэн төлөлт, үйлчилгээний талаар, интернэт банк, шимтгэл хураамжийн ил тод байдал гэх мэт асуудлуудаар хэрэглэгчид тус байгууллагад хандсаар байгаа аж.
Иймээс ШӨХТГ-аас цаашид хууль тогтоомж зөрчигдөхөөс урьдчилан сэргийлж, аливаа зөрчил дутагдалгүй ажиллаж, Өрсөлдөөний тухай хууль, Хэрэглэгчийн эрхийг хамгаалах тухай хуулийн хэрэгжилтийг хангаж ажиллах талаар шаардлага хүргүүлжээ.
Албан шаардлагын дагуу арилжааны банкуудаас үйл ажиллагаандаа тавих хяналтыг сайжруулан ажиллаж байгаа талаар тайлбар хариу ирж байгаа гэв.