"The MongolZ" баг гуравдугаар байр эзэлснээр 150,000 ам.долларын шагнал авлаа

Н.Эрхбаяр, iKon.mn
57 минутын өмнө
iKon.MN
Зураг зураг

Цахим спортын Counter Strike-2 (CS2) тоглоомын хоёрдугаар зэрэглэлийн PGL Bucharest 2026 тэмцээний шигшээ шатны тоглолтууд Румын улсын Бухарэст хотноо зохион байгуулагдлаа. 

1.2 сая ам.долларын шагналын сантай тэмцээнд манай улсын "The MongolZ" баг гуравдугаар байр эзэллээ. Тэд уржигдар шөвгийн наймд ОХУ-ын "PARIVISION" багийг 2:1 тооны харьцаатай хожсон бол өчигдөр шөвгийн дөрөвт "FUT Esports" багт 0:2-оор хожигдсон. 

Ийнхүү өнөөдөр гуравдугаар байрын төлөө Францын "3DMAX" багтай тоглож, 2:0 тооны харьцаатай илт давуу ялалт байгуулав. Уг тоглолтод "The MongolZ"-ийн тамирчид эсрэг багтаа ердөө долоохон үе алдаж, 26 үе авсан бөгөөд "Techno" буюу М.Содбаяр хамгийн өндөр үзүүлэлтэй тоглолоо. 

Түүнчлэн манай баг 2026 он гарснаас хойш өндөр чансаатай таван тэмцээнд оролцож, анхныхаа медальт байрыг эзэлж байна. PGL Bucharest 2026 тэмцээний гуравдугаар байр эзэлснээр 150,000 ам.долларын шагнал авч, дэлхийн чансааны дөрөвт бичигдэж эхэллээ. 

"The MongolZ"-ийн дараагийн оролцох тэмцээн бол тавдугаар сарын 7-ноос Казахстан улсад эхлэх "PGL Astana 2026" байх юм. Тус тэмцээн нь 1.6 сая ам.долларын шагналын сантайгаар зохион байгуулагдах бөгөөд дэлхийн шилдэг 16 баг өрсөлдөнө. Мөн манай улсын "The Huns Esports" баг энэ тэмцээнд оролцоно.